कोयनानगर - मुसळधार पावसासाठी प्रसिद्ध कोयना विभागात पावसाची सध्या जोरदार बॅटिंग सुरू आहे. त्यामुळे कोयना विभागातील नैसर्गिक धबधबे ओसंडून वाहू लागले आहेत. पर्यटनपंढरी असणाऱ्या या नगरीत पर्यटकांची मांदियाळी पाहायला मिळत आहे.

कोरोनामुळे गेली दोन वर्षे पर्यटन बंद होते. त्यामुळे पर्यटकांचा हिरमोड झाला होता. गतवर्षी ओझर्डे या नयनरम्य धबधबा परिसरात भूस्खलन झाले. त्यामुळे आजूबाजूचा परिसर धोकादायक बनला आहे. मात्र, धबधब्याचे सौंदर्य अबाधित राहिले आहे. सध्या या परिसरात मुसळधार पावसाच्या सरीवर सरी कोसळत असल्याने या धबधब्याचे सौंदर्य ओसंडून वाहत आहे. पर्यटकांचे आकर्षण असलेल्या या धबधब्याकडे पर्यटकांची पावले वळू लागली आहेत.

सध्या या धबधब्याचा आनंद लांबूनच लुटावा लागत आहे. कोयना परिसर हा नयनरम्य व निसर्गरम्य परिसर आहे. पावसाळ्यात या परिसराचे सौंदर्य ओसंडून वाहत असते. पावसाची बरसात सुरू झाल्यावर बहरलेल्या निसर्गाचे अनोखे रूप पर्यटकांना अनुभवायाला मिळते. कोयना विभाग धबधब्याचा परिसर असल्याने प्रत्येक ठिकाणी पर्यटक ओलेचिंब होऊन निसर्गाचा मनमुराद आस्वाद घेत आहेत. मुसळधार पावसात गरमागरम मक्याचे कणीस खाण्याची मजा औरच आहे. ठिकठिकाणी पर्यटक ही मजा लुटत आहेत.