मेढा (जि. सातारा) : बोंडारवाडी येथे होणाऱ्या धरणाच्या निश्‍चित झालेल्या मूळ रेषेवर धरण झाले तर पश्‍चिम व मध्य जावळीतील 54 गावांचा पिण्याचा व शेतीचा पाणीप्रश्न मिटेल. 30 वर्षांचा विचार न करता 100 वर्षांचा विचार करून सुधारित केलेल्या प्रस्तावाप्रमाणे धरण होण्यासाठी आमदार शिवेंद्रसिंहराजे भोसले (Shivendra Raje Bhosale) यांनी लक्ष घालून तातडीने प्रश्न मार्गी लावावा, असे आवाहन बोंडारवाडी धरण कृती समितीचे निमंत्रक विजयराव मोकाशी यांच्यासह सर्व कृती समितीने येथे पत्रकार परिषदेत केले.
 
लोकप्रतिनिधी म्हणून शिवेंद्रसिंहराजेंनी बोंडारवाडी धरणाचा प्रश्न मार्गी लागण्यासाठी मोठे प्रयत्न केले आहेत. मात्र, आंदोलनाला एक वर्ष पूर्ण होऊनही दिलेल्या आश्वासनाची पूर्तता न करता संबंधित अधिकारी या आंदोलनाचा इफेक्‍ट कमी करण्याचे काम करताहेत, असा प्रश्न उपस्थित करून आमदार भोसले यांनी लक्ष दिल्यास बोंडारवाडी धरणाचा प्रश्न लवकर मार्गी लागेल व सुधारित प्रस्तावाबाबतची बैठक होऊन कामाला गती येईल, असा विश्वासही श्री. मोकाशी यांनी व्यक्त केला.

अर्थमंत्री निर्मला सीतारमण यांच्या बजेटमधील मोठ्या घोषणा वाचा एका क्लिकवर

मूळ धरणरेषा निश्‍चित झाली असून ती गावापासून 100 ते 150 मीटरवर आहे. हीच जागा योग्य असून याच जागेवर धरण झाले तरच धरणाचा हेतू सफल होईल. त्यासही यापूर्वी तत्त्वतः मान्यता मिळाली होती. त्यामुळे मूळ धरण रेषा बदलण्याचा प्रश्नच येत नाही, असेही त्यांनी स्पष्ट केले. धरणाचे अंदाजपत्रक करण्यास दिरंगाई होत आहे. हे धरण मातीऐवजी सिमेंटमध्ये व्हावे. त्यामुळे पाण्याची गळती होणार नाही आणि खालची गावेही सुरक्षित राहतील, अशीही मागणी त्यांनी केली. 

यावेळी मोहनराव कासुर्डे, आदिनाथ ओंबळे, हरिभाऊ शेलार, विलास शिर्के, सुरेश कासुर्डे, जे. डी. जुनघरे, जगन्नाथ जाधव, सुरेश पार्टे, विजय सपकाळ, संजय दळवी, भास्करराव धनावडे, रघुनाथ पार्टे, बजीरंग चौधरी, श्रीरंग बैलकर, हणमंत शिंगटे, उषा उंबरकर, राणी पठाडे आदी उपस्थित होते.

Edited By : Siddharth Latkar