सातारा : मुख्यमंत्री एकनाथ शिंदे (Eknath Shinde) कालपासून तीन दिवस दरे (Dare Mahabaleshwar) या त्यांच्या मूळगावी मुक्कामी आले आहेत. काल दुपारी त्यांचे विशेष हेलिकॉप्टरने दरे येथे आगमन झाले. विश्रांती व शांततेसाठी ते गावी आले असून, गावच्या देवस्थानची वार्षिक पूजाही गुरुवारी होणार आहे, त्यामध्ये ते सहभागी होणार आहेत.

गावाविषयी असलेले प्रेम आणि गावातील प्रत्येक कार्यक्रमात सहभागी होण्याचा पायंडा मुख्यमंत्री एकनाथ शिंदे यांनी पाळला आहे. लोकसभेच्या निवडणुकीची (Lok Sabha Elections) धामधूम आता संपली आहे. सर्वांना निकालाची प्रतीक्षा आहे. चार जूनला मतदारांचा कौल कोणाला, हे समजणार आहे. त्यामुळे सर्वांच्याच मनात अस्वस्थता वाढली आहे.

या सर्व पार्श्वभूमीवर मुख्यमंत्री एकनाथ शिंदे काल (मंगळवार) दुपारी दरे या त्यांच्या मूळगावी तीन दिवस मुक्कामासाठी विशेष हेलिकॉप्टरने दाखल झाले आहेत. विश्रांतीसाठी आणि शांततेसाठी आपण गावी आल्याचे त्यांनी सांगितले. येत्या ३० तारखेला दरे गावच्या देवस्थानची वार्षिक पूजा आहे, त्या पूजेला ते उपस्थित राहणार आहेत.

त्यानंतर एक दिवस ते बुलडाण्याला लग्न समारंभाला जाणार आहेत. त्यानंतर ते मुंबईला हेलिकॉप्टरने परत जाणार आहेत. सध्या लोकसभाच्या निकालाची सर्वांना प्रतीक्षा आहे. चार जून रोजी मतदारांनी महायुती की महाविकास आघाडीला कौल दिलाय, हे समजणार आहे. त्यापूर्वी मन:शांती मिळविण्यासाठी मुख्यमंत्री दरे गावी मुक्कामी आहेत. गावात आल्यावर शांतता लाभते, असे त्यांचे म्हणणे आहे.