गोंदवले : ज्ञानोबा माऊलीसह श्रीरामाचा जयघोष होताच टाळ मृदंगचा ठेका टिपेला पोचला अन श्री ब्रह्मचैतन्य महाराजांच्या पादुका फुलांनी सजविलेल्या रथात विराजमान करण्यात आल्या. गोंदवलेकरांची गळाभेट घेऊन विठुरायाच्या भेटीला निघालेले वारकरी आज सकाळी पंढरपूरकडे मार्गस्थ झाले. श्री ब्रह्मचैतन्य महाराजांचे कुलदैवत असलेल्या विठू माऊलीच्या दर्शनाची आस लागून राहिलेले भाविक आज गोंदवल्यात भक्तिभावाने तृप्त झाल्याचे पाहायला मिळाले. कोरोनामुळे दोन वर्षानंतर निघालेल्या आषाढी वारीत यंदा वारकऱ्यांची संख्या मोठ्या प्रमाणात वाढलेली दिसली.

दिंडीत सहभागी होण्यासाठी काळापासूनच गोंदवल्यात गर्दी होऊ लागली होती.सकाळी समाधी मंदिरात भक्तीचा महापूर आला होता.प्रथेनुसार आजही वारकऱ्यांनी मंदिरात पिठलं भाताचा आस्वाद घेतला.मंदिरात विश्वस्तांच्या हस्ते श्रींच्या पादुकांचे पूजन झाल्यावर श्री अनंतकोटी ब्रह्मणांडनायक... च्या जयघोषात श्रींच्या पादुका मंदिरातून निघाल्या.फुलांनी सजविलेल्या रथात श्रींच्या पादुका विराजमान करण्यात येताच वारकऱ्यांनी केलेल्या श्रीरामनामाबरोबर ज्ञानोबा माऊलीच्या जयघोषाने परिसरात अधिकातच भक्तिरस न्हावून निघाला.विश्वस्तांनी श्रींच्या प्रतिमेचे पूजन केल्यानंतर मंदिरातून रथ मार्गस्थ झाला. रथापुढे हलगीच्या तालावर पताकाधारी वारकऱ्यांसह बत्ताशा घोडा ताल धरून नाचत होता.मुख्य रस्त्यावरून ही दिंडी गावातील थोरले श्रीराम मंदिराजवळ आल्यावर सरपंच जयप्रकाश कट्टे यांनी पादुका व प्रतिमा पूजन केले.यावेळी ग्रामपंचायत सदस्य उपस्थित होते.

येथे आरती व भजन झाल्यानंतर पुन्हा ही दिंडी वैभव चौकातून मुख्य रस्त्यावर आली. गावाच्या वेशीवर ग्रामस्थांनी वारकऱ्यांची गळाभेट घेत निरोप घेतला अन वारीसाठी निघालेली श्रींची दिंडी पंढरपूरकडे मार्गस्थ झाली. दरम्यान वारकऱ्यांच्या सेवेसाठी ग्रामस्थांसह भाविक जागोजागी फराळ,दूध,तसेच पाण्याच्या बाटल्यांचे वाटप करत होते.गावोगावच्या दिंड्या देखील श्रींच्या दिंडीत सहभागी झाल्या आहेत.विशेषतः साताऱ्यासह सांगली,कोल्हापूर, पुणे,नगर,सोलापूर भागातूनही वारकरी मोठ्या संख्येने या दिंडीत सहभागी झाले आहेत.या वारकऱ्यांच्या सेवेसाठी समाधी मंदिर समितीसह वारकरी मंडळाने उपाययोजना केल्या आहेत.आज दिंडीचा पहिला मुक्काम म्हसवड येथे होणार असून पिलीव व भाळवणीच्या मुक्कामानंतर दिंडी आठ जुलैला पंढरपुरात पोचणार आहे.