दहिवडी (जि. सातारा) : माण तालुक्‍यातील 95 पैकी 61 ग्रामपंचायतींची निवडणूक जाहीर झाली असल्याने आता राजकीय वातावरण तापणार आहे. त्यातच सरपंचपदाचे आरक्षण ग्रामपंचायत निवडणुकीनंतर जाहीर होणार असल्यामुळे गाव पुढाऱ्यांची कसरत होणार आहे. 

माणमधील राजकीय वातावरण विधानसभा निवडणुकीनंतर शांत होते. मध्येच बाजार समितीच्या पदाधिकारी निवडीवरून थोडा गदारोळ माजला होता. तर पदवीधर व शिक्षक मतदारसंघाच्या निवडणुकीत थोडी हालचाल जाणवली. पण, खऱ्या अर्थाने राजकीय वातावरणातील गरमागरमी ग्रामपंचायत निवडणुकीत दिसणार आहे. या निवडणुकीत गल्लीपासून मुंबईपर्यंतचे कधीकधी दिल्लीपर्यंतचे नेते सहभागी होताना दिसतात. 

पुन्हा गुदगे- येळगावकर गटांतच रंगणार मायणीच्या निवडणुकीचा रणसंग्राम

माणमधील 95 पैकी 61 ग्रामपंचायतींची निवडणूक जाहीर झालेली आहे. यात मार्डी, लोधवडे, कुकुडवाड, गोंदवले बुद्रुक, देवापूर, वर-म्हसवड, राणंद, शिंगणापूर, वडजल, पिंगळी बुद्रुक या राजकीयदृष्ट्या महत्त्वाच्या ग्रामपंचायतींचा समावेश आहे. दहिवडी मंडलातील चार, मार्डी मंडलातील 11, मलवडी मंडलातील दहा, म्हसवड मंडलातील सात, गोंदवले बुद्रुक मंडलातील 12, कुकुडवाड मंडलातील आठ आणि शिंगणापूर मंडलातील नऊ ग्रामपंचायतींचा समावेश आहे. बोथे, श्रीपालवणसह कारखेल, पळसावडे या माणच्या विरुध्द सीमांवरील गावांमध्ये निवडणूक असल्यामुळे एक प्रकारे संपूर्ण माणमध्येच निवडणुकीचे वातावरण असणार आहे. 

रुईघर उपसरपंचांवरील अविश्‍वास ठराव मंजूर

प्रथमच निवडणुकीनंतर सरपंच आरक्षण जाहीर होणार असल्याने गावपुढाऱ्यांची चांगलीच गोची झाली आहे. नक्की कुणाला? कुठे उभे करायचे, स्वतः निवडणूक लढवायची की अर्धांगिनीला मैदानात उतरावयाचे, याचे मोठे कोडे सर्वांनाच पडले आहे. मोठा खर्च करून निवडणूक लढवली अन्‌ सरपंच आरक्षण दुसरे पडले तर काय करायचे, याची विवंचना सर्वांना लागून राहिली आहे. 

संपादन : बाळकृष्ण मधाळे