कोयनानगर (जि. सातारा) : धरण पाणलोट क्षेत्रात गेल्या पाच दिवसापासून उसंत घेतलेल्या पावसाने दमदार कमबँक केले. यामुळे शतकाच्या उंबरठ्यावर असणाऱ्या कोयना धरणातील पाणीसाठ्याने शतक ओलांडले आहे. पाणलोट क्षेत्रात पाऊस असून धरणाचे दरवाजे व पायथा वीज गृह बंद आहेत. धरणाची जलपातळी वाढत असल्याने कोयना धरण प्रशासनाने रविवारी (ता. ३०) सकाळी आठ वाजल्यापासून कोयना धरणातून पाणी सोडण्याचे चालू केले आहे. धरणाचा पायथा वीज गृह कार्यान्वित करून त्यातून नदीपात्रात 2100 क्यूसेक पाण्याचा विसर्ग चालू केल्याची माहिती कोयना सिंचन विभागाचे कार्यकारी अभियंता कुमार पाटील यांनी दिली आहे. 

दरम्यान, कोयना धरणात 100 टीएमसी पाणीसाठा झाल्यामुळे सोमवारी (ता. ३०) कोयना धरणातील पाणीसाठ्याचे जलपूजन गृहराज्यमंत्री शंभूराज देसाई यांच्या हस्ते होणार आहे. गत २४ तासात धरण पाणलोट क्षेत्रातील कोयनानगर येथे 25 मिलीमीटर, नवजा 49 मिलीमीटर तर महाबळेश्वर येथे 65 मिलीमीटर पावसाची नोंद झाल्यामुळे धरणात येणाऱ्या पाण्याची आवक 15,325 क्यूसेक इतकी झाल्याने धरणाची जलपातळी 2159.10 फूट झाली असून धरणात 100.49 टीएमसी पाणीसाठा झाला आहे. 

पाण्याची समस्या मिटली, राज्यातली धरणं काटोकाट भरली!

पाणलोट क्षेत्रात दमदार पाऊस सुरु असून धरणाच्या जलपातळीत वाढ होत आहे. जलपातळी नियंत्रित करण्यासाठी धरणाचा पायथा वीज गृह पुन्हा एकदा कार्यान्वीत करण्यात आला आहे. धरणातून नदीपात्रात 2,100 क्यूसेक पाण्याचा विसर्ग सोडण्यात येत आहे. कोयना धरण पूर्ण क्षमतेने भरण्यासाठी केवळ पाच टीएमसी पाणीसाठ्याची गरज असून धरणातील पाणीसाठ्याने शंभर टीएमसी ही मॅजिक फिगर ओलांडल्यामुळे कोयना प्रशासनाने धरणातील पाणीसाठ्याच्या जलपूजनाचा कार्यक्रम उद्या सोमवारी गृहराज्यमंत्री शंभूराज देसाई यांच्या हस्ते आयोजित केल्याचे कोयना सिंचनचे कार्यकारी अभियंता पाटील यांनी सांगितले.

संपादन : बाळकृष्ण मधाळे