कास : पराभव झाला म्हणजे सर्व संपले असे होत नाही. माझ्या विरोधात मोठी शक्ती वापरण्यात आली असल्याचे आमदार शशिकांत शिंदे (Shashikant Shinde) यांनी सांगितले. तापोळा विभागातील कोयना, सोळशी व कांदाटी येथील लोकसभा निवडणुकीच्या (Lok Sabha Elections) आभार दौऱ्याप्रसंगी ते बोलत होते.

यावेळी तालुकाध्यक्ष सुभाष कारंडे, सरचिटणीस सुनील सपकाळ, विशाल पार्टे, विलास भोसले, संतोष मोरे, जगदीप झरेकर, संतोष धनावडे, प्रकाश पडगे, बाजीराव शेलार, शंकर कारंडे, आनंद नलावडे, आशिष चोरगे, संतोष शिंदे, श्रीरंग निपाणे, नामदेव जाधव, श्रीरंग शिंदे, प्रकाश कदम, रवींद्र भालेराव, संजय भालेराव, महादेव शिंदे आदी प्रमुख कार्यकर्त्यांसह भागातील नागरिक उपस्थित होते. त्यांनी कोयना धरण परिसरातील समस्या, दरड कोसळून वाहतुकीस होणाऱ्या अडथळ्यांच्या समस्यांची पाहणी केली.

यावेळी पत्रकारांशी संवाद साधताना श्री. शिंदे म्हणाले, ‘‘या भागातील लोकांनी जी. जी. कदम यांच्यानंतर माझ्यावर प्रेम केले आहे. या ऋणातून उतराई होण्यासाठी, आभार मानण्यासाठी आलो आहे. निवडून आल्यानंतरच लोकांचे प्रश्न सोडवायचे, या मताचा मी कार्यकर्ता नाही. तापोळा येथील पर्यटनाला वाव दिला पाहिजे.’’ मुनावळे येथील जलपर्यटन प्रकल्पामुळे तापोळा येथील पर्यटनावर परिणाम होतोय. हा खासगीकरणाचा परिणाम आहे. येथे नाइट सफारी सुरू करता येईल का? यासाठी लोकांशी चर्चा केली आहे. यानुसार येथील कामांसाठी कायम प्रयत्नशील राहणार असल्याचे त्यांनी सांगितले.

कार्यकर्त्यांना ताकद देऊ

पुढील दिशा काय असेल या प्रश्नावर बोलताना श्री. शिंदे म्हणाले, पवार साहेबांचा आदेश शिरसावंद्य मानून आम्ही काम करतो. सातारा जिल्हा, यशवंत विचारांचा, शरद पवारांच्या विचाराचा करण्यासाठी आगामी काळात प्रयत्नशील राहणार असून सर्वसामान्य कार्यकर्त्यांना ताकद देण्याचे काम करू.