नागठाणे - आरोग्य क्षेत्रातील सर्वोच्च प्रतिष्ठेचा राष्ट्रीय पातळीवरील यंदाचा ‘फ्लोरेन्स नाईटिंगेल पुरस्कार’ माधवी चिखले यांना राष्ट्रपती द्रौपदी मुर्मू यांच्या हस्ते प्रदान करण्यात आला.

माधवी चिखले या मूळच्या सातारा तालुक्यातील निगडी वंदन येथील रहिवासी आहेत. त्या सध्या पंजाबमधील मोहाली येथील फोर्टीस इस्पितळात मुख्य नर्सिंग अधिकारी म्हणून कार्यरत आहेत. देशभरातील ३४ लाख परिचारिकांच्या प्रस्तावांतून त्यांची २०२३ मधील ‘फ्लोरेन्स नाईटिंगेल’ पुरस्कारासाठी निवड झाली. राष्ट्रपती भवनातील सोहळ्यात राष्ट्रपती मुर्मू यांच्या हस्ते पुरस्कार प्रदान करण्यात आला. सुरुवातीच्या काळात त्यांनी महाराष्ट्रात सेवा बजाविली.

महिलांच्या आरोग्यविषयक जनजागृतीत त्यांनी मोठे योगदान दिले आहे. परिचारिका असलेल्या त्यांच्या आई स्मिता राणे, सासूबाई कांचन चिखले यांची प्रेरणा मोलाची ठरल्याचे त्यांनी ‘सकाळ’शी बोलताना सांगितले. पती अमोल, चिरंजीव चैतन्य, कन्या तपस्या यांच्यासह चिखले कुटुंबाचे पाठबळही महत्त्वपूर्ण ठरले. निगडी ग्रामस्थांसह विविध मान्यवरांनी त्यांचे अभिनंदन केले.

मॅरेथॉनचा छंद...

आरोग्यसेवेत कार्यरत असताना माधवी चिखले यांनी धावण्याचा छंद जोपासला आहे. मुंबई ते पुणे ही १६० किलोमीटर अंतराची अल्ट्रा सिटी रन त्यांनी पूर्ण केली आहे. सातारा हिल मॅरेथॉनमध्येही सहभागी झाल्याची आठवण त्यांनी या निमित्ताने नमूद केली. इंडो- अमेरिकन सोसायटीची फेलोशिपही त्यांना प्राप्त झाली आहे.