कऱ्हाड (सातारा) : वादळी पावसाचा (Heavy Rain in Karad) काल (ता. ९) कऱ्हाड व पाटण तालुक्यांला मोठा तडाखा बसला. त्यात हातातोंडाशी आलेली भाजीपाला, पालेभाज्यांसह विविध पिकांचे मोठे नुकसान झाले. त्यामुळे शेतकऱ्यांच्या तोंडचा घास हिरवल्यासारखी स्थिती झाली असून, त्यांचे नुकसान लाखोंच्या घरात आहे. तालुक्यातील ५० ते ६० घरांवरील पत्रे उडून अनेकांचे संसार उघड्यावर आले आहेत. तीसहून अधिक वाहनांवर व काही घरांवर झाडे पडूनही संबंधितांना मोठा फटका बसला आहे. विजेचे खांब, तारा तुटून महावितरणचेही मोठे नुकसान झाले आहे.

दुपारनंतर अचानक वादळी वाऱ्यासह पावसास सुरुवात झाली. वादळी वाऱ्याने झाडे, फांद्या तुटून रस्त्यावर पडल्या. अनेक ठिकाणी झाडे वाहनांवर व विजेच्या खांबावर पडली. विजेचे खांबही मोडून पडले. त्यामुळे वीजपुरवठा खंडित झाली. त्यातून महावितरणचे मोठे नुकसान झाले. सुमारे तीन तास वाऱ्यासह आलेल्या पावसाने हातातोंडाशी आलेल्या भाजीपाला, पालेभाज्यांच्या पिकांसह आंबा, काकडी, कलिंगड, मका, टरबूज, टोमॅटो, दोडका आदी पिकांचे मोठे नुकसान झाले. वादळी वाऱ्यात तालुक्यातील ५० ते ६० घरांवरील पत्रे उडून अनेकांचे संसार उघड्यावर आले आहेत. अनेक ठिकाणी घरांवर झाडे पडूनही नुकसान झाले आहे. नुकसानग्रस्तांपुढे संसार सावरण्याचे मोठे आव्हान उभे आहे.

पोलिस, वायरमनचे पावसातही काम

वादळी वाऱ्यामुळे रस्त्यावर अनेक ठिकाणी रस्त्यावर झाडे पडली होती. अनेक ठिकाणी विजेचे खांब मोडून तारा रस्त्यावर पडल्या होत्या. त्यामुळे वाहतूक विस्कळित झाली होती. पोलिस अधिकारी, कर्मचारी, पालिकेची यंत्रणा आणि महावितरणच्या कर्मचाऱ्यांनी भर पावसातही हे संकट दूर करण्यासाठी रात्री उशिरापर्यंत मेहनत घेत परिस्थिती पूर्वपदावर आणली. त्यामुळे वाहतूक सुरळीत होऊन रात्री उशिरा वीजपुरवठाही पूर्ववत झाला.