सातारा : साताऱ्यातील माण येथे एका महिलेला भररस्त्यात लाथाबुक्क्यांनी मारहाण केल्याचा प्रकार काल घडला होता. या धक्कादायक घटनेचा व्हिडिओ सोशल मीडियावर व्हायरल झाला असून अनेकांकडून याप्रकरणी संताप व्यक्त केला जात आहे. तर खासदार सुप्रिया सुळे यांच्याकडून यासंदर्भातील व्हिडिओ शेअर करत आरोपींवर तातडीने कारवाई करण्याची मागणी करण्यात आली आहे.

"माण, सातारा येथे महिलेला भररस्त्यात लाथा-बुक्क्यांनी मारहाण केल्याचा व्हिडिओ माध्यमातून पाहण्यात आला. हा व्हिडिओ अतिशय संतापजनक आणि दुर्दैवी आहे. गृहखात्याचा वचक कुठेही दिसून येत नाही. त्यामुळे महिलांवर अत्याचार करणाऱ्या प्रवृत्ती निर्ढावल्या आहेत.

राज्यात कायदा आणि सुव्यवस्था राखण्यासाठी गृहमंत्र्यांनी आपल्या खात्याकडे लक्ष देणे खुप गरजेचे आहे. महिलांना अशाप्रकारे मारहाण करणाऱ्या व्यक्तीवर तातडीने कठोर कारवाई करण्याची आवश्यकता आहे." असं ट्वीट सुप्रिया सुळे यांनी केलं आहे.

काय आहे व्हिडिओमध्ये ?

या व्हिडिओमध्ये एक महिला रस्त्यावर पडलेली असून चार जण तिला लाथाबुक्क्यानी जबर मारहाण करताना दिसत आहेत. तर गावातील चौकामध्ये अनेक लोकं हा प्रकार पाहताना दिसत आहेत. बघणाऱ्यांपैकी एकजणही सोडवण्यासाठी पुढे येत नाही. महिलेकडून घेतलेले पैसे परत मागितल्याने चौघांनी मारहाण केल्याची माहिती समोर आली आहे.