कऱ्हाड (जि. सातारा) : कऱ्हाड तालुक्‍यातील कॉंग्रेस, राष्ट्रवादी कॉंग्रेस व शिवसेनेच्या कार्यकर्त्यांनी एकदिलाने काम केले. त्यामुळेच पदवीधर व शिक्षक मतदारसंघावर ठराविक लोकांची असणारी मक्तेदारी मोडण्यामध्ये यश आले, असे प्रतिपादन नवनिर्वाचित शिक्षक आमदार जयंत आसगावकर यांनी येथे केले.

शिक्षक मतदारसंघातील नवनिर्वाचित आमदार आसगावकर यांचा कॉंग्रेसच्या वतीने ऍड. उदयसिंह पाटील-उंडाळकर यांच्या हस्ते सत्कार करण्यात आला. त्याप्रसंगी ते बोलत होते. शेती उत्पन्न बाजार समितीचे सभापती महादेव देसाई, कऱ्हाड तालुका खरेदी-विक्री संघाचे अध्यक्ष रंगराव थोरात, कोयना बॅंकेचे अध्यक्ष रोहित पाटील, कॉंग्रेसचे युवा नेते इंद्रजित चव्हाण, नगरसेवक आप्पा माने, प्रा. धनाजी काटकर, अशोकराव पाटील-पोतलेकर, जगदीश निकम आदी उपस्थित होते. आमदार आसगावकर म्हणाले, "कऱ्हाड तालुक्‍यातील मतदार व कार्यकर्ते यांनी चांगले काम केले. कॉंग्रेस, राष्ट्रवादी कॉंग्रेस व शिवसेनेच्या कार्यकर्त्यांनी एकदिलाने काम केल्यानेच विजयश्री खेचून आणता आली. त्या माध्यमातून पदवीधर आणि शिक्षक मतदारसंघावर असणारी ठराविक लोकांची मक्तेदारी मोडण्यात यश आले आहे. यापुढेही शिक्षक, कार्यकर्ते यांना माझ्यापरीने सर्वतोपरी सहकार्य करेन.'' 

यशवंतरावांनी जो नि:स्वार्थी मार्ग स्वीकारला, त्याच मार्गावर मी वाटचाल करेन : आसगावकर

ऍड पाटील-उंडाळकर म्हणाले, "जिल्ह्यात कॉंग्रेस, राष्ट्रवादी कॉंग्रेस, शिवसेनेच्या कार्यकर्त्यांनी अत्यंत नियोजनबद्ध पद्धतीने प्रचार यंत्रणा राबवली. पदवीधर व शिक्षक मतदारसंघामध्ये काम केल्याने दोन्ही उमेदवारांचा प्रचंड मताधिक्‍याने विजय झाला आहे. यापुढेही येणाऱ्या प्रत्येक निवडणुकीमध्ये याच पद्धतीने कामकाज करून विजयश्री खेचून आणली जाईल. त्यासाठी कार्यकर्त्यांनी एकदिलाने काम करावे.'' श्री. काटकर यांनी प्रास्ताविक केले. महादेव देसाई यांनी आभार मानले. 

संपादन : बाळकृष्ण मधाळे