Satara News : साताऱ्यातील दोन्ही राजेंमधील वाद थांबण्याचं नाव घेत नाहीये. दररोज एकमेकांविरुध्द आरोप-प्रत्यारोपाच्या फैरी झडत आहेत. आता या वादात आणखी ठिणगी पडलीय. ज्यांना जनतेनं मनापासून आणि कायमस्वरुपी पालिकेतून रिटायर्ड केलं, त्यांनी सातारा विकास आघाडीनं आता रिटायर्डमेंट घ्यावी, असा सल्ला देणं म्हणजे चोंबडेपणा आहे, असा टोला खासदार उदयनराजे भोसले (Udayanraje Bhosale) यांनी आमदार शिवेंद्रसिंहराजे भोसले यांना लगावला.

उदयनराजे म्हणाले, प्रशासकीय राजवट लागून आता जवळपास एक वर्ष होत आहे. नागरिकांचे मूलभूत प्रश्न सोडवण्यासाठी साविआ काहीच करीत नाही अशी बोंब मारणारेच ज्यावेळी कासचं जलपूजन केलं, त्यावेळी साविआचा संबंध काय अशी गरळ ओकत होते. नथीतून तीर मारण्याचा त्यांचा प्रकार जुनाच आहे. दोन्ही डगरीवर हात ठेवणारा आमदार आता सैरभैर झालाय. त्यांना जनतेमधून थारा मिळणार नाही याची भीती वाटत असल्यानं ते आमच्यावर टीका करत आहेत.

कुरतडलेली दाढी आणि भुरसट मिशांना पीळ देण्यापेक्षा प्रेमानं कोणाला आलिंगण देणं केव्हाही चांगलं. त्यांच्यासारखं निदान आमच्या पोटात एक आणि ओठात एक असं तरी नाही, असा पलटवार उदयनराजेंनी मिठ्या मारणं, पप्प्या घेणं या शिवेंद्रसिंहराजेंच्या टीकेवर केलाय. आम्ही हत्तीच्या चालीनं चाललो आहोत. भुंकणाऱ्यांकडं आम्ही लक्ष देत नाही, असंही त्यांनी शिवेंद्रसिंहराजेंना फटकारलं.