भुईंज : येथील पाणी पुरवठा आवारात अज्ञात दोन ते तीन जणांनी अनिल नामदेव कुचेकर यांचा ऊस, झाडाच्या फांद्यांनी व दगडाने मारहाण निर्घृण खून केला. भुईंज (Bhuinj Police Station) येथील कृष्णा नदीकाठी असलेल्या ग्रामपंचायतीच्या पाणी पुरवठा स्कीमच्या आवारात रात्री साडेदहानंतर अनिल कुचेकर (वय ३५) याचा खून झाला.

अनिल रात्री साडेदहा वाजेपर्यंत त्याच्याबरोबर हमालीत असणारे दोघा संशयितांना बरोबर दारुच्या दुकानासमोर शेवटी दिसला होता. त्यानंतर आज सकाळी सात वाजण्याच्या सुमारास माधव सुरेश चव्हाण हा पाण्याच्या टाकीच्या शेजारुन जात असताना त्याला अनिल पडलेल्या अवस्थेत दिसला.

त्याच्याजवळ जाऊन माधवने पाहिले असता अनिलच्या डोक्याच्या पाठीमागून रक्तस्त्राव झालेला दिसला, त्याने अनिलचा चुलतभाऊ युवराज कुचेकर यास सांगितले. युवराज कुचेकर याने घटनास्थळी येऊन पाहिले असता अनिल मृतावस्थेत पडलेला दिसला. त्याने या घटनेची माहिती ताबडतोब भुईंज पोलिस ठाण्यात जाऊन दिली.

घटनास्थळी सहायक पोलिस निरीक्षक विशाल भंडारे, नितीन जाधव, चंद्रकांत भोसले, संजय धुमाळ आदी आले असता अनिलचा मृतदेह पंपहाऊसच्या मैदानाशेजारी आढळून आला. मृतदेहापासून शंभर फूट अंतरावर त्याला मारहाण करण्यात आल्याच्या खूना असून ऊस, झाडाच्या फांद्या, एक मध्यम आकाराचा दगड, तसेच लहान दोन-तीन दगड तसेच नळाच्या पाइपचे तुकडे आढळून आले आहेत. मारहाणीनंतर मृतदेह सुमारे शंभर फूट अंतरावर फरफटत नेऊन टाकला आहे. याबाबतचा अधिक तपास पोलिस करत आहेत.