नागठाणे, (जि.सातारा) - रिक्षाचालक असलेल्या वडिलांच्या कष्टाला अनोखी मानवंदना देताना कन्येने आपल्या लग्नाचे वऱ्हाडही रिक्षातून नेण्याचा हट्ट धरला. पित्यानेही तो पुरा करताना आपल्या लेकीचा विवाह सोहळा संस्मरणीय केला. यामुळं आई-वडिलांचाही ऊर भरून आला.

राजेवाडी हे सातारा शहरालगतचे गाव. येथील विजय खामकर हे व्यवसायाने रिक्षाचालक. त्यांची कन्या सायली हिचा विवाह सांगवड (ता. पाटण) येथील शुभम पाटील यांच्याशी काल झाला. तो सर्वांच्याच लक्षात राहणारा ठरला. त्याचे कारणही अगदी तसेच होते. या विवाहासाठी जमलेली वऱ्हाडी मंडळी चक्क रिक्षातून विवाहस्थळी दाखल झाली.

आपल्या वडिलांचे आयुष्य कष्टात गेले. रिक्षा व्यवसायातून कुटुंबाला स्थैर्य लाभले, या भावनेतूनच सायलीने विवाहासाठी येणारी वऱ्हाडी मंडळी रिक्षातून न्यायचा आग्रह धरला. यातून तिने आपल्या वडिलांच्या कष्टाला अनोख्या पद्धतीने जणू सलामच केला. सुमारे २० रिक्षांतून ही वऱ्हाडी मंडळी साताऱ्यातील मंगल कार्यालयात दाखल झाली.

एकाच वेळी इतक्या मोठ्या संख्येने सजविलेल्या रिक्षांचा ताफा पाहून ये- जा करणारेही बुचकळ्यात पडले होते. यामागची पार्श्वभूमी समजताच साऱ्यांनीच सायलीचे, तिच्या वडिलांचे तसेच आई नीता, भाऊ हर्षद, शुभम आदींचे कौतुक केले. या निमित्ताने कुटुंबीय, नातेवाईक यांच्या दृष्टीनेही हा विवाह सोहळाही संस्मरणीय ठरला.

मुलांना आईवडिलांच्या कष्टाची जाणीव असणे, यातच त्यांच्या कष्टाचे चीज दडलेले असते. सायलीने हेच दाखवून दिले. आम्हाला तिचा अभिमान वाटतो.

- विजय खामकर, राजेवाडी