मेढा (सातारा) : जावली तालुक्याची (Jawali Taluka) मुख्य बाजारपेठ असलेल्या मेढा शहरात वाहनांच्या पार्किंगची मोठी समस्या निर्माण झाली होती. याच पार्श्वभूमीवर वाहतूक व्यवस्थेची वर्दळ कमी करण्यासाठी मेढ्यात (Medha) सम-विषम (Odd-Even Parking) तारखांना एकेरी पार्किंग सुविधा करण्याचा निर्णय उपविभागीय अधिकारी सोपान टोम्पे यांच्या अध्यक्षतेखाली नुकताच घेण्यात आला.

मेढा हे जावली तालुक्याचे मुख्यालय असल्याने या ठिकाणी येणाऱ्या नागरिकांची वर्दळ ही मोठ्या प्रमाणावर असते. परिणामी, मेढा शहरात येणाऱ्या वाहनांची संख्या देखील मोठी असते. यामुळे मेढ्यात वाहनांच्या पार्किंगची समस्या नेहमीच निर्माण व्हायची. नागरिक कुठेही आपले वाहने पार्क करत असतं, त्यामुळे गर्दी तसेच वाहतूक कोंडीच्या समस्या वारंवार शहरात निर्माण व्हायच्या. यावर तोडगा काढण्यासाठी प्रांताधिकारी सोपान टोम्पे यांच्या अध्यक्षतेखाली तहसील कार्यालयात बैठक घेण्यात आली होती. या बैठकीत सम आणि विषम तारखेला एकेरी पार्किंग करण्याचा निर्णय घेण्यात आला. सातारा-महाबळेश्वर रस्त्यावर सर्व वाहनांसाठी सम-विषम तारखेला एकेरी वाहतूक असणार आहे. कुडाळ रस्त्याला सम-विषम तारखेला एकेरी वाहतूक असणार आहे. तसेच बाजारचौक व कोयना हॉटेल ते तहसीलदार कार्यालयाच्या दरम्यान असणाऱ्या रस्त्यावर सम-विषम तारखेला फक्त दुचाकींची एकेरी वाहतूक असणार आहे.

सम-विषम पार्किंग व्यवस्थेची सुरुवात मंगळवार १० ऑगस्ट पासून सुरू झाली असून पार्किंगच्या नियमांचे उल्लंघन केल्यास वाहनधारकांवर कारवाई करण्यात येणार असल्याचे प्रांताधिकारी टोम्पे व मेढ्याचे सपोनि अमोल माने यांनी सांगितले. या बैठकीसाठी तहसीलदार राजेंद्र पोळ, सपोनि अमोल माने, मेढा नगरपंचायत मुख्याधिकारी अमोल पवार, नगराध्यक्ष पांडुरंग जवळ, नगरसेवक विकास देशपांडे, शशिकांत गुरव, तलाठी रामचंद्र सावंत, व्यापारी संघटनेचे शरद गांधी, संतोष वारागडे, रफिक शेख, गणेश जवळ, फारुख शेख, रामचंद्र गोरे आदी उपस्थित होते.