कोयनानगर - मॉन्सून लांबल्याने कोयना धरणात पाण्याचा ठणठणाट आहे. धरणात केवळ १५ टीएमसी पाणीसाठा शिल्लक आहे. धरणात उपलब्ध पाणीसाठ्यावर पश्चिमेकडील वीजप्रकल्प, तर पूर्वेकडील शेती सिंचन चालू आहे. धरणातील पाणीसाठा कमी झाला असूनही शेती सिंचनासाठी साठा आरक्षित असल्याने कोयना जलविद्युत प्रकल्पातून कमी क्षमतेने वीजनिर्मिती करण्यात येत आहे. पश्चिमेकडील वीज प्रकल्पासाठी धरणातून अत्यल्प पाणीसाठा वापरला जात आहे. कोयना धरणात केवळ १० जुलैपर्यंत उपलब्ध असणारा पाणीसाठा पुरणार आहे.

कोयनची १०५.२५ टीएमसी पाणीसाठवण क्षमता आहे. धरणात १५ टीएमसी पाणीसाठा शिल्लक आहे. उपलब्ध अत्यल्प पाणीसाठ्यावर पूर्वेकडील सिंचन, तर पश्चिमेकडील वीजप्रकल्प कार्यान्वित आहेत. पूर्वेकडील शेती सिंचनासाठी धरणातून दोन हजार १०० क्युसेक, तर पश्चिमेकडील वीज प्रकल्पाला दररोज ०.२ टीएमसी पाणीसाठा सोडला आहे. धरणातील पाणीसाठा ओहोटीकडे आहे. त्यामुळे पाण्याचा खडखडाट जाणवत आहे.

धरणातील उर्वरित पाणीसाठा शेती सिंचनासाठी आरक्षित असल्याने वीजनिर्मितीवरही मर्यादा येऊ लागल्या आहेत. पश्चिमेकडील वीज प्रकल्पासाठी पाण्याचा वापर कमी झाला आहे. पश्चिमेकडील वीज प्रकल्पातून कमी क्षमतेने वीजनिर्मिती करण्यात येत आहे. एक जूनच्या नवीन जल वर्षापासून पश्चिमेकडील वीज प्रकल्पासाठी २.८ टीएमसी पाण्याचा वापर महानिर्मिती कंपनीने केला आहे, तर पूर्वेकडील सिंचन प्रकल्पासाठी २.४४ टीएमसी पाण्याचा वापर झाला आहे. ०.५१ टीएमसी पाणीसाठा वीजनिर्मितीसाठी कमी वापरण्यात आला आहे. धरणातील पाणीसाठा १० जुलैपर्यंत पुरणार आहे.