कास (सातारा) : शिवसागर जलाशयात (Shivsagar Reservoir) पोहताना बुडालेल्या संकेत काळेचा मृतदेह सकाळी सात वाजता नदीपात्रात तरंगताना आढळून आला.

रेठरे (ता. कऱ्हाड) येथील 20 जणांचा ग्रुप मंगळवारी म्हावशी येथील शिवसागर जलाशयाच्या काठावर पर्यटनासाठी आले होते. सायंकाळी शिवसागर जलाशयात पोहताना संकेत बुडाला होता. गेले तीन दिवस त्याचा शोध त्या परिसरात नदीपात्रात घेतला जात होता. महाबळेश्वर ट्रेकर्स, आमदार शिवेंद्रसिंहराजे ट्रेकर्स आणि स्थानिक प्रशासन गेली तीन दिवस त्याचा शोध घेत होते.

अखेर बुडालेल्या संकेत काळेचा मृतदेह काल सकाळी सापडला. गेले तीन दिवस संकेतबरोबर आलेले त्याचे मित्र, नातेवाईक तसेच स्थानिक नागरिक घटनास्थळी थांबून संकेतचा शोध घेण्याचा प्रयत्न करत होते. संकेत 27 वर्षांचा असून, त्याला दीड वर्षाची लहान मुलगी आहे. मृतदेहाचा पंचनामा मेढा पोलिसांनी (Medha Police) करून मृतदेह नातेवाइकांच्या ताब्यात देण्यात आला. पुढील तपास सहायक पोलिस निरीक्षक अमोल माने यांच्या मार्गदर्शनाखाली केला जात आहे.