सातारा : गेल्या वर्षभराच्या काळात शाळा बंद असूनही जिल्ह्यातील खासगी शाळा पालकांना संपूर्ण फी भरण्यासाठी तगादा लावत असून, खासगी शाळा चालकांच्या मनमानीविरुद्ध जिल्ह्यातील पालक एकत्रित येत पालक संघाच्या वतीने लढा देण्याचा निर्णय घेण्यात आला होता. याची दखल घेत महाराष्ट्र राज्य खासगी शाळा संघटनेने पालक संघाशी चर्चा करत फी कमी करण्याबाबत सकारात्मकता दर्शविली आहे. याबाबत पुढील काही दिवसांत निर्णय घेण्याचे आश्‍वासन असोसिएशनने पालकांना दिले आहे. 

दोन दिवसांपूर्वी पालक संघाच्या वतीने संपूर्ण फीची मागणी करणाऱ्या खासगी शाळांविरोधात डिजिटल मोहीम राबविताना "जेवढी सेवा तेवढेच पैसे' घ्यावे, अशीही मागणी केली होती. या विरोधात सर्व पालकांनी एकत्र येत पालक संघाची स्थापनाही केली. पालकांची मागणी रास्त असल्याने सर्वच नागरिकांचा पाठिंबा मिळत असल्याने खासगी शाळांच्या विरोधात पालक एकवटल्याचे चित्र दिसून आले. त्यामुळे असोसिएशनने बोलविलेल्या बैठकीत फीसंदर्भात सकारात्मक चर्चा झाल्याचे पालक संघाचे प्रशांत मोदी यांनी सांगितले. या बैठकीप्रसंगी खासगी शाळा संघाचे अमित कुलकर्णी, राजेंद्र चोरगे, पालक संघाचे रितेश रावखंडे, कल्पेश गुजर व इतर पालक उपस्थित होते. 

चिंताजनक! साताऱ्याला कोरोनाचा घट्ट विळखा; जिल्ह्यात 474 जणांचे अहवाल पाॅझिटिव्ह, 4 बाधितांचा मृत्यू

कोरोनाचा प्रादुर्भाव डिसेंबरपासून कमी होताच सुरुवातीला नववी, दहावी आणि त्यानंतर पाचवी ते नववीपर्यंतचे वर्ग सुरू केले. परंतु, केवळ दीड महिन्यात पुन्हा कोरोना वाढल्याने शाळा बंद केल्या. आधीच कोरोनामुळे आर्थिक स्थिती बिघडलेली असताना ऑनलाइन शिक्षणासाठीही पालकांना इंटरनेट व नवीन मोबाईलसाठी भुर्दंड बसला आहे. त्यामुळे खासगी शिक्षण संस्थांनी "जेवढी सेवा तेवढेच पैसे' घ्यावेत, अशी आग्रही मागणी पालकांनी केली. तसेच अनेक संस्थाचालक शिक्षकांचा पगार, लाइट बिले अशी कारणे पुढे करून पालकांना पूर्ण फी भरण्यासाठी दबाव आणत आहेत. जिल्ह्यातील अनेक शाळांमध्ये नर्सरी, ज्युनियर केजी व इतर लहान गटातील विद्यार्थ्यांच्या ऑनलाइन शिक्षणाचे सुमारे 25 ते 50 हजारांची मागणी करत असल्याचाही मुद्दा पालकांनी बैठकीत मांडला. यावेळी असोसिएशनने पुढील आठड्याभरात सर्व पालक व खासगी शाळांचे प्रतिनिधी यांच्याशी चर्चा करून निर्णय घेणार असल्याचे सांगितले. 

न विचारता शाळेतून बाहेर गेल्याने विद्यार्थ्याला शिक्षकांकडून जबर मारहाण; पाचगणीत ठाण्याचा विद्यार्थी गंभीर जखमी

विद्यार्थ्यांचे ऑनलाइन शिक्षण सुरू करा... 

पालकांनी पूर्ण फी भरली नसल्याने अनेक खासगी शिक्षण संस्थांनी विद्यार्थ्यांचे ऑनलाइन शिक्षण बंद केले आहे. या प्रसंगी फीअभावी खासगी शाळांनी ऑनलाइन वर्ग बंद केलेल्या विद्यार्थ्यांचे पुन्हा शिक्षण सुरू करावे, असे आवाहन असोसिएशनने केले आहे. तसेच कोणत्याही खासगी संस्थेने फीसाठी दबाव टाकणे गंभीर असल्याचेही त्यांनी सांगितले आहे. 

राजकीय गट-तट बाजूला ठेऊन खटाव-पुसेगावचा विकास साधणार : आमदार शशिकांत शिंदे

संपादन : बाळकृष्ण मधाळे