कऱ्हाड : एसटी कर्मचारी संपामुळे प्रवाशांचे मोठे हाल सुरु आहेत. त्याचा विचार करुन एसटी प्रशासनाने तातडीने कर्मचाऱ्यांना कामावर हजर होण्याचे आदेश दिले आहेत. एसटी प्रशासनाच्या अवाहनाला प्रतिसाद देत येथील एसटी हजर झालेल्या चालक, वाहकांमार्फत कऱ्हाड-पुणे, कऱ्हाड-ढेबेवाडी एसटी बस सुरु करण्यात आल्याची माहिती आगार व्यवस्थापक विजय मोरे यांनी दिली.

एसटी महामंडळाचे राज्य शासनात विलगीकरण करण्यात यावे या मागणीसाठी राज्यभरातील एसटी कर्मचाऱ्यांनी कामबंद आंदोलन सुरु केले आहे. त्यामुळे प्रवाशी, विद्यार्थी यांची मोठी गैरसोय होत आहे. संपाचा विचार करुन परिवहन मंत्री अनिल परब यांनी कर्मचाऱ्यांना ४१ टक्के पगारवाढ केल्याचे सांगीतले आहे. मात्र, कर्मचाऱ्यांनी शासनात विलीनीकरण हा मुद्दा लावुन धरला असुन आंदोलन सुरूच ठेवले आहे.

या परिस्थितीमुळे सतत वर्दळ असलेल्या बस स्थानकांमधील वाहतूक ठप्प झाली आहे. दरम्यान शासनाने एसटीच्या कर्मचाऱ्याना कठोर निर्णय न घेण्यासाठी तातडीने कामवर हजर रहावे, असे आवाहन केले आहे. त्याला प्रतिसाद देत कऱ्हाड एसटी आगारात चालक,वाहक हजर झाले आहेत. त्यांच्यामार्फत आज कऱ्हाड-पुणे, कऱ्हाड-ढेबेवाडी या एसटी बस सुरु करण्यात आल्या आहेत. आणखी कर्मचारी हजर झाल्यावर नवीन मार्गावर सेवा सुरु करण्यात येतील. त्यासाठी कामगारांनी कामावर हजर व्हावे असे आवाहन आगार व्यवस्थापक विजय मोरे यांनी केले आहे.

५२ कर्मचारी केले निलंबीत

परिवहन मंत्री अनिल परब यांच्या आवाहनाला प्रतिसाद न देता अनेक एसटी कर्मचारी संपावर ठाम आहेत. त्यामुळे एसटीच्या प्रशासाने कठोर निर्णय घेण्यास सुरुवात केली आहे. त्याअंतर्गत येथील एसटी आगारातील चार कंत्राटी कर्मचाऱ्यांची सेवा समाप्त करण्यात आली आहे. तर ५२ चालक, वाहक, कार्यशाळा कर्मचारी यांचे निलंबन करण्यात आले आहे. वरिष्ठांच्या सुचनेनुसार ही कारवाई करण्यात आल्याची माहिती येथील आगार व्यवस्थापक श्री. मोरे यांनी दिली.