माणमध्ये १ जून ते १७ जूनपर्यंत सामान्यपणे ५९.६ मिलिमीटर पाऊस पडतो; पण प्रत्यक्षात यंदा या कालावधीत एकूण १७ दिवसांपैकी सरासरी ९ दिवस पाऊस पडला.
दहिवडी : माण तालुक्यावर (Man Taluka Rain) जूनच्या पहिल्या पंधरवड्यातच वरुणराज प्रसन्न झाल्याने ओढे, नाले खळाळू लागले आहेत. जूनच्या पहिल्या पंधरवड्यातच सरासरी दोनशे मिलिमीटर पाऊस माण तालुक्यात पडला आहे. विशेष म्हणजे जूनच्या पहिल्या पंधरवड्यात महाबळेश्वरपेक्षा जास्त पाऊस (Mahabaleshwar Rain) माणमध्ये पडला आहे. महाबळेश्वरमध्ये १८६.७ मिलिमीटर पडला आहे. गेल्या कित्येक वर्षात प्रथमच असं घडलं असून, माणमधील पावसाचे प्रमाण हे पहिल्या पंधरवड्यातील सामान्य पावसाच्या ३३२ टक्के इतके आहे.
माण तालुका मागील काही महिन्यांपासून दुष्काळाशी झुंज देत आहे. ऐन उन्हाळ्यात तर भीषण पाणीटंचाईचा सामना करताना सामान्य ग्रामस्थांसह प्रशासन मेटाकुटीस आले होते. टँकरद्वारे मोठ्या लोकसंख्येला, तसेच जनावरांना पाणी पुरवताना अडचणींचा डोंगर उभा राहात होता. सर्व जण वळिवाकडे आस लावून बसले होते; पण एप्रिल व मे महिन्यांत म्हणावा असा वळीव कोसळलाच नाही. त्यामुळे सर्व जण पावसाची चातकासारखी वाट बघत होते.
जून महिन्यात माण तालुक्यात रिमझिम पावसाला सुरुवात होत असते आणि तो सुद्धा पडला तर पडला नाहीतर बहुतांशीवेळा जून पावसाच्या प्रतीक्षेतच जातो. मुसळधार पाऊस अन् तो सुद्धा जून महिन्यात अनेकांनी गेली कित्येक वर्षे पाहिलेला नाही, काहींना तर आठवत सुद्धा नाही. मात्र यंदाचा जून माणसाठी काही वेगळाच आहे. साधारण ५ जूनला पावसाने माण तालुक्यात दमदार आगमन केले. ५ जूनपासून आजपर्यंत अपवाद वगळता दररोज थोडा का होईना पाऊस पडतोय. त्यातही अनेकदा दमदार स्वरूपाचाच पाऊस पडतोय.
सातत्याने पडत असलेल्या या दमदार पावसाने मोकळ्या शेतशिवारांना तळ्याचे स्वरूप आले आहे. प्रमाणापेक्षा जास्त पाणी साठल्याने ताली फुटल्या आहेत. काही ठिकाणी शेतं वाहून गेली आहेत. ओढ्यानाल्यांना पूर आल्याने सिमेंट बंधारे भरभरून वाहू लागले आहेत, तर पाझर तलावांच्या पाणीपातळीत कमालीची वाढ झाली आहे. तळ गाठलेल्या विहिरी काठोकाठ भरण्याच्या तयारीत आहेत. या पावसाने शेतकऱ्यासह सर्वसामान्यांमध्ये समाधानाचे वातावरण आहे.
माणमध्ये १ जून ते १७ जूनपर्यंत सामान्यपणे ५९.६ मिलिमीटर पाऊस पडतो; पण प्रत्यक्षात यंदा या कालावधीत एकूण १७ दिवसांपैकी सरासरी ९ दिवस पाऊस पडला असून, आजपर्यंत १९५.१ मिलिमीटर पाऊस पडला आहे. हा पाऊस सामान्य पावसाच्या ३२७.५% इतका आहे. या उलट महाबळेश्वरमध्ये ५२०.५ मिलिमीटर अपेक्षित असताना फक्त १८६.७ मिलिमीटर पडला असून, टक्केवारी सामान्य पावसाच्या फक्त ३५.९% इतकी आहे.
दहिवडी १८८.२ ११
मलवडी २७८.६ ११
गोंदवले बुद्रुक २१३.७ ११
कुकुडवाड १३९.५ ६
म्हसवड १४६.८ ८
मार्डी १९५.३ ११
शिंगणापूर २०४.४ १०
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.