सातारा : राष्ट्रवादी कॉंग्रेसचे अध्यक्ष खासदार शरद पवार यांच्या नेतृत्वाखाली राष्ट्रवादी कॉंग्रेस पक्ष येत्या दहा जूनला 21 वा वर्धापनदिन साजरा करीत आहे. उपमुख्यमंत्री अजित पवार, राष्ट्रवादी प्रदेशाध्यक्ष जयंत पाटील व खासदार सुप्रिया सुळे यांच्या सूचनेनुसार यानिमित्त जिल्ह्यात विविध सामाजिक उपक्रम राबविण्यात येणार आहेत, अशी माहिती जिल्हाध्यक्ष सुनील माने यांनी दिली.
 
यामध्ये जिल्ह्यातील तालुक्‍यांच्या ठिकाणी रक्तदान शिबिर होतील. पक्षाच्या विविध सेलच्या माध्यमातून राष्ट्रवादी कार्यालय येथे 10 जूनला सकाळी दहा वाजता रक्तदान शिबिर व राष्ट्रवादी ऑनलाइन नोकरी महोत्सव होणार आहे. कोरोनाच्या पार्श्वभूमीवर सोशल डिस्टन्सिंगचे पालन करत हे शिबिर होणार आहे. पक्षाचे सर्व सेलचे प्रमुख, कार्यकर्ते, तसेच जनतेने रक्तदानात सहभागी व्हावे, असे आवाहन जिल्हाध्यक्ष माने यांनी केले आहे. या वेळी विधान परिषद सभापती रामराजे निंबाळकर, खासदार श्रनिवास पाटील, पालकमंत्री बाळासाहेब पाटील, जिल्हा प्रभारी आमदार शशिकांत शिंदे, मकरंद पाटील, दीपक चव्हाण, प्रभाकर घार्गे, सत्यजित पाटणकर, दीपक पवार, प्रभाकर देशमुख उपस्थित राहणार आहेत. राष्ट्रवादी युवक कॉंग्रेसच्या वतीने वर्धापनदिनानिमित्त "ऑनलाइन नोकरी महोत्सव'अंतर्गत बेरोजगार युवक- युवतींना रोजगार संधी उपलब्ध करून देण्यात येणार आहे. गरजू बेरोजगार युवक- युवतींनी पुढे यावे, असे आवाहन करण्यात आले आहे.

इच्छुक बेरोजगार युवकांनी खाली दिलेल्या गुगल ड्राइव्हच्या https://forms.gle/xikubng6MBGTpPgp8 लिंकवर क्‍लिक करून नावनोंदणी करावी, असे आवाहन युवकचे जिल्हाध्यक्ष तेजस शिंदे यांनी केले आहे.

दमदार कामगिरी : 56 गुन्ह्यांतील फरार आराेपी पाेलिसांच्या पाठलागानंतर जेरबंद