कुकुडवाड (जि. सातारा) : जांभुळणी ग्रामपंचायतीवर तीर्थक्षेत्र श्री भोजलिंग परिवर्तन पॅनेलने सत्ता खेचून आणली. अकरापैकी सात उमेदवार निवडून आल्यामुळे या पॅनेलच्या स्वाती काळेल यांची सरपंचपदी, तर बापू काळेल यांची उपसरपंचपदी बिनविरोध निवड झाली. 

निवडणुकीपूर्वी सरपंचपदाचे आरक्षण जाहीर न झाल्यामुळे ही निवडणूक मोठ्या अटीतटीने लढली गेली. त्यामध्ये शिदेश्वर काळेल, धनाजी काळेल, सचिन नरळे, बुधाजी काळेल यांच्या नेतृत्वाखाली व अभय जगताप यांच्या मार्गदर्शनाखाली राष्ट्रवादी कॉंग्रेसने जांभुळणी ग्रामपंचायतीमध्ये घवघवीत यश मिळवले.

केंद्र सरकारच्याविरोधात, शेतकऱ्यांच्या समर्थनार्थ वंचितची साताऱ्यात धरणे

सरपंचपदासाठी स्वाती काळेल व उपसरपंचपदासाठी बापू काळेल यांचे दोनच अर्ज आल्याने आणि विरोधी गटातील सदस्य अनुपस्थित राहिल्याने दोन्ही निवडी बिनविरोध झाल्या. यावेळी सत्ताधारी गटाचे सिद्धार्थ तोरणे, सिंधू कोकरे, सुनीता कोकरे, राणी काळेल, कविता सरगर आदी सदस्य उपस्थित होते. निवडणूक निर्णय अधिकारी म्हणून बी. बी. महामुनी यांनी काम पाहिले. ग्रामसेवक बी. एस. बोराटे उपस्थित होते. 

साताऱ्याच्या बातम्या वाचण्यासाठी येथे ► क्लिक करा

संपादन : बाळकृष्ण मधाळे