कऱ्हाड (जि. सातारा) : सैदापूर-गोवारे गावांमधून जाणारा कृष्णा कालव्याचे अस्तरीकरण करण्याबाबत जलसंपदा राज्यमंत्री बच्चू कडू यांना देण्यासाठी उपसा सिंचन प्रकल्पाचे कार्यकारी अभियंता रेड्डीयार यांना बळीराजा शेतकरी संघटनेच्या वतीने साजीद मुल्ला व शेतकऱ्यांनी निवेदन दिले. 

निवेदनातील माहिती अशी : कृष्णा कालवा हा सैदापूर गोवारे या गावामधून जातो. कृष्णा कालवा हा मातीत असल्यामुळे पावसाळ्यामध्ये, तसेच अतिवृष्टीमुळे हा कालवा वारंवार खचत आहे. अस्तरीकरण नसल्यामुळे त्यात भरच पडत असल्याने कालव्यास धोका निर्माण झाला आहे. त्यामुळे भविष्यात कालवा फुटण्याचा धोका निर्माण झाला आहे, तसेच हा कालवा स्वच्छ करण्यासाठी, तसेच खचलेला भाग भरून घेण्यासाठी सरकारला दर वर्षी लाखो रुपये खर्च करावे लागतात. त्यामुळे सरकारला दर वर्षी मोठ्या प्रमाणात आर्थिक नुकसान होत आहे. 

धोकादायक! खासगी क्षेत्रात आगीमुळे वनक्षेत्र धोक्‍यात; दीड हजार हेक्‍टर क्षेत्राची झाली राख 

कालव्यात दुर्घटनेमुळे अनेकांना आपला जीव गमवावा लागला आहे. गोवारे गावातील ग्रामस्थ, शाळा-महाविद्यालयांत जाणारे विद्यार्थीही याच रस्त्याचा वापर वाहतुकीसाठी करतात. रस्त्यावरून मोठ्या प्रमाणात वाहतूक होत असते. कालवा जागोजागी खचल्यामुळे भविष्यात कालवा फुटण्याची भीती आहे. त्याचा विचार करून तातडीने कालव्यास अस्तरीकरण करावे. या वेळी सरपंच वैभव बोराटे, उपसरपंच विजय पाटील, शिवाजीराव कदम, जयवंत महाडिक, शंकर कोळगे यांनी निवेदन दिले. 

संपादन : बाळकृष्ण मधाळे