सातारा : खटाव तालुक्‍यातील वडूज, पुसेगाव परिसरात चोरी, दरोडा व घरफोडीच्या 56 गुन्ह्यांत फरारी असलेल्या अट्टल चोरट्यास सातारा स्थानिक गुन्हे शाखेच्या पथकाने सापळा रचून नेर, फडतरवाडी (ता. खटाव) येथे ताब्यात घेतले. त्याने गेल्या सहा महिन्यांच्या कालावधीत आपल्या साथीदारांसह टाकलेले दरोडे, जबरी चोरी व घरफोडीचे गुन्हे कबूल केले आहेत.
 
वडूज, पुसेगाव पोलिस ठाण्याच्या हद्दीत मागील सहा महिन्यांपासून दरोडे, जबरी चोरी व घरफोडीचे प्रकार वाढले होते. यासंदर्भात पोलिस अधीक्षक तेजस्वी सातपुते यांनी गुन्हे उघडकीस आणण्याबाबत स्थानिक गुन्हे अन्वेषण विभागास सूचना दिल्या होत्या. त्यानुसार स्थानिक गुन्हे अन्वेषण विभागाचे पोलिस निरीक्षक सर्जेराव पाटील यांनी पोलिस उपनिरीक्षक प्रसन्न जऱ्हाडे यांच्या नेतृत्वाखाली पथक तयार करून संशयिताचा शोध सुरू केला होता. दरम्यान, दरोडे, घरफोडीतील फरारी संशयित नेर (ता. खटाव) परिसरात वावरत असल्याची माहिती श्री. पाटील यांना खबऱ्याकडून मिळाली होती. त्यानुसार स्थानिक गुन्हे अन्वेषण विभागाच्या पथकाने पुसेगाव, नेर, फडतरवाडी येथे सापळा रचला. मात्र, संशयित पोलिस आल्याचा सुगावा लागल्याने त्याने पळून जाण्याचा प्रयत्न केला.
 
पोलिसांनी पाठलाग करून त्यास शिताफीने ताब्यात घेतले. त्याच्याकडे अधिक चौकशी केली असता त्याने वडूज, पुसेगाव परिसरात गेल्या सहा महिन्यांपासून दरोडे, घरफोडी व जबरी चोरी केल्याचे कबूल केले. 

कऱ्हाड तालुक्यातील तुळसणमध्ये 17 जणांना केले क्वारंटाईन

निसर्गचा महाबळेश्‍वरला कोट्यवधींचा तडाका; पंचनामे सुरुच