सातारा : सातारा औद्योगिक वसाहतीतील (Satara Industrial Estate) पंडित ऑटोमोटिव्‍हच्‍या (Pandit Automotive) जागेच्‍या कारणावरुन दोन्‍ही राजांच्‍यात टीकायुध्‍द सुरुय. खासदार उदयनराजे भोसले (Udayanraje Bhosale), आमदार शिवेंद्रराजे (Shivendrasinharaje Bhosle) यांच्यातील विस्तव अजून गेलेला नाही, एकमेकांवर हल्लाबोल करण्याची संधी हे दोन्ही नेते कधीही सोडत नाहीत. कधी टोलनाक्यावरून तर मग कधी साध्या दारूच्या दुकानावरून अनेकदा वाद रंगलाय.

शिवेंद्रराजेंनी पत्रकार परिषद घेऊन पुन्हा एकदा उदयनराजेंवर निशाणा साधलाय. पत्रकार परिषदेत शिवेंद्रराजे यांनी उदयनराजेंचा चांगलाच समाचार घेतला. ते म्हणाले, मला चिरडायचं असेल तर हत्तीची गरज नाही, उदयनराजेंनी माझ्या अंगावर उडी मारली तरी मी चिरडून जाईन, असा टोला त्यांनी लगावला. पंडित ऑटोमोटिव्ह कंपनी आमदार शिवेंद्रराजे यांनी बेकायदेशीर रित्या खरेदी केल्याचा आरोप करत कामगारांवर अन्याय करणा-या लोकांना राजेशाही असती तर हत्तीच्या पायाखाली देऊन चिरडलं पाहिजे, असं विधान उदयनराजे यांनी शिवेंद्रराजेंचं नाव न घेता केलं होतं. त्याला शिवेंद्रराजेंनी प्रत्युत्तर दिलंय.

सातारा एमआयडीसी (Satara MIDC) वाढत नसल्‍याचे एकमेव कारण खासदार उदयनराजे (Udayanraje Bhosale) असून उद्योजकांना धमकावणे, दमदाटी करणे, वसुल्‍या करायच्‍या आदी कामे ते आणि त्‍यांचे बगलबच्‍चे करतात. या व इतर अनेक कारणांमुळे सातारा एमआयडीसीऐवजी उद्योजकांनी इतर ठिकाणांना पसंदी दिल्‍याची टीका आमदार शिवेंद्रसिंहराजे (Shivendrasinharaje Bhosle) यांनी केली. कारखानदारांकडून हप्ते घेणं, त्यांना दमटाटी करणं यामुळे सुद्धा साता-यातील एमआयडीसीमध्ये कंपन्या आल्या नाहीत आणि असलेल्या कंपन्या निघून गेल्या आहेत. मी ही कंपनीची जागा खरेदी करताना संपूर्ण कायदेशीरपणे खरेदी केली आहे, त्यामुळे उदयनराजेंचे हे आरोप बिनबुडाचे आहेत, असंही त्यांनी सांगितलं.