कऱ्हाड : एसटी कर्मचाऱ्यांचे शासनात विलीनीकरण करावे, या मागणीसाठी एसटी कर्मचाऱ्यांमार्फत (st employees)येथील यशवंतराव चव्हाण यांच्या प्रीतिसंगमावरील समाधिस्थळापासून मुंबईतील आझाद मैदानापर्यंत(Azad Maidan) पदयात्रा काढण्यात येणार होती. त्यासाठी कर्मचारी प्रीतिसंगमावर आल्यावर पोलिसांनी पदयात्रेस प्रशासनाची परवानगी नसल्याने संबंधितांना ताब्यात घेतले. एसटी महामंडळातील कार्यरत असणाऱ्या कर्मचाऱ्यांना राज्य शासनाच्या कर्मचाऱ्यांच्या दर्जा द्यावा, त्यांना शासनाच्या सेवेत सामावून घेऊन विलीनीकरण करावे, यासाठी गेल्या दोन महिन्यांपासून संप सुरू आहे. त्याचा मोठा फटका ग्रामीण भागातील प्रवाशांना बसला आहे.त्यावर अद्याप तोडगा निघालेला नाही. त्यामुळे कर्मचारी संतप्त झाले आहेत.

त्यामुळे कर्मचाऱ्यांनी पुन्हा आपले काम बंद आंदोलन सुरूच ठेवले आहे. त्यामुळे एसटीलाही कोट्यवधी रुपयांचा फटका बसला आहे. या विलीनीकरणाच्या लढ्यात आतापर्यंत ६५ कर्मचाऱ्यांचा मृत्यू झाला आहे. त्यांच्या आदरांजलीसाठी आणि शासनाचे लक्ष वेधण्यासाठी एसटी कर्मचाऱ्यांमार्फत आज सकाळी येथील यशवंतराव चव्हाण यांच्या प्रीतिसंगमावरील समाधिस्थळापासून मुंबईतील आझाद मैदानापर्यंत पदयात्रा काढण्यात येणार होती. त्यासाठी कर्मचारी प्रीतिसंगमावर आले होते. मात्र, त्यांना शासनाची परवानगी नसल्याने शहर पोलिस ठाण्याचे वरिष्ठ पोलिस निरीक्षक बी. आर. पाटील, पोलिस कर्मचारी प्रशांत पाटील, रवींद्र देशमुख, अमोल साळुंखे, उत्तम बर्गे यांनी ताब्यात घेतले. त्यानंतर त्यांना पोलिस ठाण्यात आणून नोटीस देऊन सोडण्यात आले. दरम्यान, प्रशासनाची परवानगी घेऊन पदयात्रा काढणार असल्याचे एसटी कर्मचारी संघटनेचे संतोष पवार यांनी सांगितले.