सातारा : राज्‍यात मुस्‍लीम (Muslim) आणि दलित समाजावर (Dalit Community) हल्‍ले वाढले असून, ते रोखण्‍यात शासनाला अपयश आल्‍याचा आरोप करत रिपाइंच्‍या वतीने जिल्‍हाधिकारी कार्यालयावर मोर्चा काढण्‍यात आला.

यावेळी जिल्‍हाधिकारी जितेंद्र डुडी यांची भेट होऊ न शकल्‍याने निवेदन देण्‍यासाठी गेलेल्‍या शिष्‍टमंडळाने जिल्‍हाधिकारी कार्यालयाच्‍या इमारतीतील पायऱ्यांवर ठिय्‍या आंदोलन केले. आंदोलन करूनही वरिष्‍ठ अधिकारी निवेदन स्‍वीकारण्‍यास न आल्‍याने आंदोलकांनी सरतेशेवटी निवेदन त्‍याठिकाणी असणाऱ्या एका कर्मचाऱ्याकडे सोपवले.

डॉ. बाबासाहेब आंबेडकर यांच्‍या जयंतीच्‍या कारणावरून नांदेड जिल्‍ह्यातील भोंडार येथील अक्षय भालेराव यांचा खून करण्‍यात आला होता. याप्रकरणी पोलिसांनी काही संशयितांना अटकदेखील केली आहे. यानंतर इतर ठिकाणीही दलितांवर हल्‍ले होण्‍याच्‍या घटना घडत होत्‍या. जातीय तणावातून नुकतेच कोल्हापूरसह इतर भागात मुस्‍लीम समाजावरदेखील हल्‍ले झाले. दोन्‍ही समाजांवर होणाऱ्या या हल्‍ल्‍यांमुळे समाजात अशांतता आहे.

हे हल्‍ले रोखत त्‍यातील दोषींवर कठोर कारवाई करण्‍यात सरकार अपयशी ठरल्‍याचा आरोप करत या जनआक्रोश मोर्चाचे आयोजन करण्‍यात आले होते. डॉ. बाबासाहेब आंबेडकर यांच्‍या पुतळ्यास अभिवादन केल्‍यानंतर हा मोर्चा राजवाडा येथे गेला. येथून पोलिस मुख्‍यालय मार्गे जिल्‍हाधिकारी कार्यालयावर आला.

येथे आलेल्‍या आंदोलकांना जिल्‍हाधिकारी कार्यालयाच्‍या प्रवेशद्वारावर अडवत रिपाइंचे जिल्‍हाध्‍यक्ष अशोक गायकवाड, अण्णा वायदंडे, सादिक शेख व इतरांच्‍या शिष्‍टमंडळास निवेदन देण्‍यासाठी जिल्‍हाधिकारी कार्यालयात नेण्‍यात आले. जिल्‍हाधिकारी उपस्‍थित नसल्‍याने शिष्‍टमंडळ संतापले आणि त्‍यांनी आतील पायऱ्यांवर ठिय्‍या मारला. बराचवेळ बसूनही निवेदन स्‍वीकारण्‍यासाठी वरिष्‍ठ अधिकारी त्‍याठिकाणी न आल्‍याने जिल्‍हा प्रशासनाचा निषेध यावेळी उपस्‍थितांनी करत मागण्‍यांचे निवदेन एका कर्मचाऱ्याकडे सोपवले.