सातारा : महामानव डॉ. बाबासाहेब आंबेडकर (Dr. Babasaheb Ambedkar) म्‍हणजे संघर्ष. या संघर्षातून विद्यार्थ्याचा हा महामानव झाला आणि त्यांनी देश घडविला. नव्या पिढ्यांसाठी, नवभारतासाठी हा महामानव प्रेरणेचा ऊर्जास्रोत आहे. त्यामुळे डॉ. बाबासाहेब आंबेडकर यांचा शाळा प्रवेश दिन तथा विद्यार्थी दिन (Student Day 7 November) मोठ्या उत्साहाने साजरा करायला हवा, असे विचार विद्यार्थी दिवस सोहळ्याच्या कार्यक्रमात मान्यवरांनी व्यक्त केले.

येथील श्रीमंत छत्रपती प्रतापसिंह महाराज हायस्कूल येथे काल (मंगळवार) शाळा प्रवेश दिन उत्साहात साजरा झाला. या वेळी समता सैनिक दलाने बिगूल वाजवून शाळेस तसेच डॉ. आंबेडकर यांना मानवंदना दिली. या वेळी सहायक समाजकल्याण आयुक्त नितीन उबाळे, विद्यार्थी दिवस प्रवर्तक अरुण जावळे, शिक्षणाधिकारी शबनम मुजावर, जातपडताळणी विभागाच्या उपायुक्त स्वाती इथापे, समता सैनिक दलाचे प्रमुख अरुण पोळ, भन्ते दीपंकर, प्रवीण धस्के आदी मान्यवरांची प्रमुख उपस्थिती होती.

डॉ. बाबासाहेब आंबेडकरांचे विचारकार्य पुढे घेऊन जाण्यासाठी जेवढे शक्य होईल, तेवढे प्रयत्न आपण केले पाहिजेत, असे सांगत प्रा. केशव पवार यांनी डॉ. बाबासाहेब आंबेडकर यांचा जीवनपट उपस्थितांसमोर उलगडला. यानंतर नितीन उबाळे, शबनम मुजावर, मुख्याध्यापक सन्मती देशमाने, प्रवीण धस्के, अरुण पोळ, अरुण जावळे यांनी मनोगत व्‍यक्‍त केले.

डॉ. बाबासाहेब आंबेडकर यांच्‍या पुतळ्यास अभिवादन केल्‍यानंतर समता सैनिक दलाने संचलन केले. एक वही एक पेन या अभियानालाही प्रतिसाद मिळाला. कार्यक्रमास आकाश कांबळे, यशपाल बनसोडे, योगेश म्हस्के, किरण कांबळे, विलासराव कांबळे, अजित जगताप, विजय मांडके, रमेश रत्नाकर आदी मान्यवरांसह राज्‍यभरातील आंबेडकर अनुयायी उपस्‍थित होते.