आरळे : अभिनेत्री श्वेता शिंदे (Actress Shweta Shinde) यांच्या घरात चोरी करणाऱ्याला स्थानिक गुन्हे अन्वेषण विभागाने (LCB) अटक केली आहे. त्यांच्यासह तीन गुन्हे उघडकीस आले असून, सुमारे १३ लाख रुपयांचे १८ तोळे सोन्याचे दागिने (Gold Jewellery) हस्तगत करण्यात आले आहेत.

राजकुमार ऊर्फ राजू ओंकारप्पा आपचे (रा. कोथळी, ता. उमरगा, जि. धाराशिव) असे त्याचे नाव आहे. जून २०२४ मध्ये त्याने शिंदे यांच्या पिरवाडी येथील बंगल्यात चोरी केली होती. या गुन्ह्याचा तपास तातडीने करण्याचे निर्देश पोलिस अधीक्षक समीर शेख यांनी एलसीबीचे निरीक्षक अरुण देवकर यांना दिले होते. त्यानुसार त्यांनी सहायक पोलिस निरीक्षक पृथ्वीराज ताटे, रोहित फार्णे, उपनिरीक्षक विश्वास शिंगाडे व अमित पाटील यांचे पथक तपासासाठी तयार केले होते.

या पथकाने गुन्ह्यात राजूचा सहभाग असल्याचे उघडकीस आणले. चौकशीमध्ये त्याने एकूण तीन गुन्ह्यांची कबुली दिली. त्यामध्ये सातारा शहर, भुईंज व लोणंद हद्दीतील प्रत्येकी एका गुन्ह्याचा समावेश आहे. या गुन्ह्यातील १८.३ तोळे सोन्याचे दागिने हस्तगत करण्यात आले आहेत. या यशाबद्दल शेख यांनी एलसीबीच्या संपूर्ण पथकाचे अभिनंदन केले आहे.