खंडाळा : पुणे-सातारा या राष्ट्रीय महामार्गावर (Pune-Satara National Highway) खंबाटकी घाटात (Khambatki Ghat) आज शनिवार-रविवार सुट्टी असल्यामुळे रस्त्यावर गाड्यांची संख्या अधिक आहे. तसेच घाटातील सहाव्या वळणावरील दत्त मंदिराजवळ माल वाहतूक ट्रक बंद असल्यामुळे या घाटाची वाहतूक पूर्णपणे जाम (Traffic Jam) झाली आहे.

हा घाट आज सकाळी १० वाजल्यापासून जाम आहे. सातारा-लोणंद रस्त्यावरील पुलाचे काम सुरू असल्यामुळे जड आणि मोठी वाहने राष्ट्रीय महामार्गाकडे वळवल्याने या घाटात गाड्यांची गर्दी पहायला मिळत आहे. रस्त्यावर ट्रक बंद पडून घाट जाम होण्याची ही घटना नवीन नाहीये.

अनेकवेळा वाहतूक महामार्ग पोलिसांनी राष्ट्रीय महामार्ग प्राधिकरणास स्वतःच्या मालकीची क्रेन उपलब्ध करण्याची मागणी केली असतानाही, अद्यापही क्रेन उपलब्ध झाली नाही. यामुळे अशा गाड्या रस्त्यावर बंद पडून वारंवार घाट जाम होताना दिसत आहे. अद्यापही वेळे (ता. वाई) येथे महामार्गावर दोन ट्रक बंद अवस्थेत उभे आहेत.

तर, बोगद्याच्या पलीकडेही एक ट्रक रस्त्यावरच बंद अवस्थेत उभा आहे. तरी, वाहतूक महामार्ग पोलिसांना क्रेन उपलब्ध करून देणे आवश्यक असल्याचे मत स्थानिक वाहनचालकांनी व्यक्त केले. या ठिकाणी वाहतूक पोलीस तात्या फरांदे व महामार्ग पोलीस वहातुकीवर नियंत्रण मिळवण्यासाठी प्रयत्न करत आहेत.