कऱ्हाड - कऱ्हाड (जि. सातारा) येथील विमानतळावर वैमानिकाचे प्रशिक्षण सुरु असताना ते लॅण्डींग करताना ट्रेनींग सेंटरचे विमान कोसळून अपघात झाला आहे. विमान धावपट्टीवर उतरताना अचानक वेग वाढल्याने विमानतळाच्या दक्षिणेकडील भिंतीच्या अलिकडे जावुन ते कोसळले. त्यात प्रशिक्षणार्थी जखमी झाला आहे. सुदैवाने मोठा अनर्थ टळला.

कऱ्हाड येथील विमानतळावर मुंबईच्या दमानिया एअरवेजच्या ॲम्बिसिअन्स फ्लाईंग क्लबने वैमानिक प्रशिक्षण केंद्र सुरू केले आहे. तेथे दररोज प्रशिक्षणार्थी वैमानिकांना प्रशिक्षण दिले जाते. त्याअंतर्गत आज एका प्रशिक्षणार्थी वैमानिकाकडुन विमान उतरताना अचानक विमानाचा वेग वाढला. त्यामुळे ते संबंधित पायलटचा नियंत्रीत करता आले नाही.

त्यामुळे ते जावुन विमानतळावरील दक्षिण बाजुच्या धावपट्टीजवळील संरक्षक भिंतीजवळ कोसळले. त्यानंतर ते पलटीही झाले. त्यामुळे त्या अपघातात प्रशिक्षणार्थी वैमानिक जखमी झाला आहे. दरम्यान अपघातानंतर संबंधित अपघातग्रस्त विमान हे विमान पार्किंगच्या परिसरात नेण्यात आले. विमान आणखी वर उडले असते तर मोठा अनर्थ घडला असता. सुदैवाने मोठा अनर्थ टळल्याचे तेथील लोकांनी सांगीतले.