वाई (सातारा) : परखंदीच्या शिवारात सकाळी अज्ञात युवकाचा मृतदेह आढळून आल्याची माहिती पोलिसांना मिळताच, वाई पोलीस (Wai Police) घटनास्थळी तात्काळ दाखल झाले.

मृतदेहाची ओळख पोलिसांनी लगेच पटवली असून खून झालेला युवक हा खानापुरातील अभिषेक रमेश जाधव (वय 20) याचा असल्याचं समोर आलंय. घटनास्थळी वाईच्या डीवायएसपी डॉ. शीतल जानवे-खराडे यांच्यासह पोलीस दाखल झाले आहेत. या घटनेमुळं वाई तालुक्यात खळबळ उडालीये.

प्रेम प्रकरणातून या युवकाचा खून झाल्याची शक्यता पोलिसांनी वर्तवलीये. दरम्यान, खानापूरमध्ये (Khanapur) तणावाचं वातावरण निर्माण झालेलं आहे. याबाबत घटनास्थळावरून मिळालेली माहिती अशी, शुक्रवारी सकाळी परखंदी गावातील (Parkhandi Village) काही नागरिक हे शेताकडं जात असताना त्यांना एका युवकाचा मृतदेह आढळून आला. त्यांनी ही बाब लगेच वाई पोलिसांना सांगितली. वाई पोलीस ठाण्याचे पोलीस निरीक्षक बाळासाहेब भरणे, पोलीस उपनिरीक्षक स्नेहल सोमदे, पोलीस उपनिरीक्षक कृष्णराव पवार, डीबी पथकाचे विजय शिर्के, श्रावण राठोड, प्रसाद दुदुस्कर यांच्यासह सर्व टीम घटनास्थळी पोहोचली.

त्यांनी मृतदेहाबाबत चौकशी केली असता व काही मृतदेहाच्या जवळील कागदपत्रावरून युवक खानापूर येथील अभिषेक जाधव असल्याचं समोर आलं. मृतदेह तात्काळ शवविच्छेदनासाठी सातारा इथं नेण्यात आला, मात्र युवकाचा खून प्रेम प्रकरणातून झाल्याची शक्यता वर्तवण्यात येत असून त्यामुळं खानापूर इथं प्रचंड तणावाचं वातावरण निर्माण झालंय. तिथंही पोलीस बंदोबस्त वाढवण्यात आला आहे. अद्यापही या खून प्रकरणातील संशयितांची नावे निष्पन्न झालेली नाहीत. घटनास्थळी अप्पर पोलीस अधीक्षक बापू बांगर हेही दाखल झाल्याचे समजतं. संशयितांचा शोध घेण्यासाठी पोलिस पथके रवाना झाली आहेत. त्याच्या मोबाईल लोकेशन वरून शोध सुरू आहे.