आदित्य एल-1 चे तिसरे अर्थ-बाऊंड ऑर्बिट मॅन्यूव्हर यशस्वीपणे पार पडलं आहे. यानंतर हा उपग्रह पृथ्वीच्या तिसऱ्या कक्षेत पोहोचला आहे. इस्रोने एक्स (ट्विटर) पोस्ट करत याबाबत माहिती दिली.

ऑर्बिट मॅन्यूव्हर प्रक्रियेच्या माध्यमातून एखादा उपग्रह आपली कक्षा बदलतो. आदित्यलाही आधीच्या कक्षेतून वरच्या कक्षेत पाठवण्यात यश मिळालं आहे. इस्रोच्या बंगळुरू येथील केंद्रावरुन ही प्रक्रिया पार पडली.

यावेळी मॉरिशस, बंगळुरू, श्रीहरीकोटा आणि पोर्ट ब्लेअर याठिकाणी असणाऱ्या इस्रोच्या ग्राउंड स्टेशन्सवरून 'आदित्य'ला ट्रॅक करण्यात आलं. सध्या हा उपग्रह 296x71,767 किलोमीटर या कक्षेत पोहोचला आहे. यापुढील ऑर्बिट मॅन्यूव्हर हे 15 सप्टेंबर 2023 रोजी पहाटे दोन वाजता पार पडेल.

आदित्य एल-1 ही भारताची पहिलीच सौर मोहीम आहे. 2 सप्टेंबर रोजी याचं यशस्वी प्रक्षेपण पार पडलं होतं. सूर्याचा अधिक जवळून अभ्यास करण्यासाठी ही मोहीम राबवण्यात येणार आहे. यासाठी आदित्य हा उपग्रह पृथ्वीपासून 15 लाख किलोमीटर दूर असणाऱ्या एल-1 या पॉइंटवर प्रस्थापित करण्यात येईल.