Ather 450 Apex : देशातील आघाडीची इलेक्ट्रिक स्कूटर उत्पादक एथर एनर्जीने ४५० ॲपेक्स मॉडेल बाजारपेठेत सादर केले आहे. एथरला १० वर्षे झाल्याने हे विशेष मॉडेल लाँच केले आहे. या मॉडेलची सर्वात मोठी खासियत म्हणजे, ही देशातील पहिली ट्रान्सपॅरन्ट डिझाईन असणारी स्कूटर आहे. नवे मॉडेल चालविण्यास सुलभ आहे. त्यात ग्राहकांना आवडेल, अशी आकर्षक रंगसंगती आहे.

याविषयी एथर एनर्जीचे सह-संस्थापक आणि मुख्य कार्यकारी अधिकारी तरुण मेहता म्हणाले, ‘‘एथरला १० वर्षे पूर्ण होत असताना आम्हाला काहीतरी विशेष करायचे होते. त्यामुळे आकर्षक डिझाईन आणि सर्वांनाच चालविण्यास उपयुक्त असे ४५० अ‍ॅपेक्स मॉडेल बाजारपेठेत आणले आहे. एथरने आतापर्यंत उत्पादित केलेली ही सर्वोत्तम स्कूटर आहे. आम्ही ४५० ॲपेक्समध्ये ‘मॅजिक ट्विस्ट’ सादर केला आहे. हे एक नावीन्यपूर्ण वैशिष्ट्य आहे, जे शहरात ई-स्कूटर चालवणे अत्यंत सोईस्कर बनवते. ४५० ॲपेक्स एक प्रीमियम आणि आकर्षक स्कूटर आहे.’’

ही इलेक्ट्रिक स्कूटर फक्त २.९ सेकंदात प्रती तास ४० किलोमीटरपर्यंत वेग वाढवू शकते. हा थ्रॉटल रिस्पॉन्स टाइम केवळ इलेक्ट्रिक स्कूटरमध्येच नाही, तर पेट्रोल स्कूटरमध्येही सर्वांत वेगवान आहे. या मॉडेलच्या बॅटरीची क्षमता जास्त असून, ब्रेक सिस्टिमही अत्याधुनिक आहे. निळा व नारंगी रंगाने हे मॉडेल आकर्षक झाले आहे.