आजकाल ऑनलाईन आर्थिक व्यवहारांसाठी सर्व जण यूपीआयचा वापर करतात. अगदी भाजी घेण्यापासून ते कार घेण्यापर्यंत सगळीकडे आपण यूपीआयने पेमेंट करतो. मात्र आता याच यूपीआय आयडीबाबत एक मोठा निर्णय घेण्यात आला आहे. नॅशनल पेमेंट्स कॉर्परेशनने (NPCI) सर्व बँका आणि थर्ड पार्टी अ‍ॅप्सना याबाबत निर्देश दिले आहेत.

काय आहे निर्देश?

जे यूपीआय आयडी एक वर्षांपासून इनअ‍ॅक्टिव्ह आहेत, म्हणजेच ज्या UPI आयडीने एका वर्षात कोणताही व्यवहार झाला नाही अशा आयडींवरील व्यवहार थांबवण्याचे निर्देश NPCI ने दिले आहेत. यासाठी 31 डिसेंबरपर्यंतची मुदत देखील देण्यात आली आहे. त्यानंतर अशा सर्व यूपीआय आयडींवरील व्यवहार थांबवले जातील. अर्थात, पुन्हा एकदा केवायसी प्रक्रिया पार पाडून तुम्ही आपले यूपीआय आयडी पुन्हा अ‍ॅक्टिव्ह करु शकता.

तुमची बँक किंवा थर्ड पार्टी अ‍ॅप (गुगल पे, फोन पे इ.) याबाबत तुम्हाला ईमेल किंवा टेक्स्ट मेसेज पाठवेल. यानंतर देखील तुम्ही काहीही अ‍ॅक्शन घेतली नाही, तर तुमच्या यूपीआय आयडीवर निर्बंध लागू होतील. यूपीआय व्यवहार अधिक सुरक्षित बनवण्यासाठी हा निर्णय घेतल्याचं एनपीसीआयने स्पष्ट केलं आहे.

असं करा अ‍ॅक्टिव्ह

तुमचा यूपीआय आयडी अ‍ॅक्टिव्ह करण्यासाठी तुम्हाला जास्त काही करण्याची गरज नाही. केवळ या आयडीवरुन तुम्हाला एखादा व्यवहार करावा लागेल. यानंतर तो आयडी इनअ‍ॅक्टिव्ह राहणार नाही. 31 डिसेंबर नंतर जरी तुमचा यूपीआय आयडी डीअ‍ॅक्टिव्हेट झाला, तरीही तुम्ही केवायसी प्रक्रियेच्या माध्यमातून तो पुन्हा सुरू करू शकाल. (Tech News)

टळणार मोठा धोका

कित्येक वेळा लोक एखाद्या मोबाईल नंबरवरुन यूपीआय आयडी तयार करतात. यानंतर आपला मोबाईल नंबर बदलताना ते त्या नंबरशी जोडलेला UPI ID बंद करणं विसरतात. जुना नंबर बंद झाल्यानंतर तो दुसऱ्या व्यक्तीला देण्यात येतो. यामुळे त्याला लिंक असलेला यूपीआय आयडी देखील या व्यक्तीकडे जाण्याचा धोका असतो.

यामुळेच बंद असलेल्या यूपीआय आयडींवर निर्बंध लागू करण्याचा निर्णय घेण्यात आला आहे. तुमचा फोन नंबर तुमच्याकडेच असेल, तर केवायसी प्रक्रिया करुन आणि ओटीपी एंटर करून पुन्हा तुमचा यूपीआय आयडी री-रजिस्टर करू शकता.