मायक्रोसॉफ्ट डाऊन झाल्याने जगभरातील अनेक बँक, आयटी, मीडिया, एअरलाईन्सची सेवा विस्कळीत झाली. कम्प्युटर आणि लॅपटॉपवर अचानक ब्लू स्क्रीन दिसू लागल्यामुळं मोठी समस्या निर्माण झाली आहे. विंडोज सुरू होण्यासाठी अजून ५ ते १० तास लागणार अशी नवी अपडेट समोर आली आहे. अशातच, बिल गेट्स यांचे नाव चर्चेत आलं आहे.

जगातील टॉप 10 श्रीमंतांच्या यादीत बिल गेट्स यांचे नाव 8 व्या स्थानवर आहे. याचे मुख्य कारण म्हणजे मायक्रोसॉफ्ट कंपनी, जिने गेट्स यांना यश मिळवून दिले. ही कंपनी सुरु होण्यात एका छोट्या जाहिरातीचाही मोठा वाटा होता.(Bill Gates got the idea of ​​Microsoft from here this is how the company was named )

मायक्रोसॉफ्ट हे आज कॉम्प्युटर जगातील खूप प्रसिद्ध नाव आहे. संगणक क्षेत्रात मायक्रोसॉफ्ट ही आघाडीची कंपनी आहे. Microsoft Corporation ची स्थापना बिल गेट्स आणि त्यांचे बालपणीचे मित्र पॉल ऍलन यांच्यासोबत मिळून 4 एप्रिल 1975 रोजी केली होती.

बिल गेट्स यांची कंपनी मायक्रोसॉफ्ट विंडोज ऑपरेटिंग सिस्टम बनवते. मायक्रोसॉफ्टचे नाव कसे ठेवले आणि ते कसे सुरू झाले? याबद्दल आपण आज जाणून घेणार आहोत.

बिल गेट्स यांचा जन्म 28 ऑक्टोबर 1955 मध्ये अमेरिका येथील सिएटल, वॉशिंग्टन येथे झाला. फोर्ब्जच्या रियल टाईम बिलेनियरच्या यादीनूसार बिल गेट्स यांची संपत्ती 123 अब्ज डॉलरपेक्षा अधिक आहे. बिल गेट्स यांचे वडील वकील होते. बिल यांनी देखील वडीलांप्रमाणेच वकीली क्षेत्र निवडावे अशी त्यांच्या पालकांची इच्छा होती. पण तसं झालं नाहीय

वयाच्या 13 वर्षीच बिल गेट्स यांनी आपला पहिला सॉफ्टवेअर प्रोग्रॅम तयार केला होता. बिल गेट्स हे कॉलेज ड्रॉपआऊट आहेत. त्यांनी 1975 मध्ये आपला व्यवसाय वाढविण्यासाठी हार्वर्ड विद्यापीठ सोडले होते. कॉलेज सोडणे आणि मायक्रोसॉफ्टची स्थापना करणे त्यांच्या जीवनातील सर्वात मोठा टर्निंग पॉईंट ठरला.

छोट्या जाहिरातीचा मोठा वाटा

मायक्रोसॉफ्ट कंपनीच्या सुरुवातीची कहाणी अनोखी आहे. 1974 मध्ये, बिल गेट्सचा मित्र पॉल ऍलन याने एका मासिकात मायक्रो कॉम्प्युटरची जाहिरात पाहिली. ॲलनने मासिक विकत घेतले आणि हार्वर्डला येऊन बिल गेट्सला दाखवले. मासिकातील जाहिरात पाहिल्यानंतर दोघांनीही एक मूलभूत यंत्रणा बनवण्याचा विचार केला. गेट्सने संगणक निर्मात्याला सिस्टमचे सादरीकरण ऑफर केले. कंपनीने दोघांनाही प्रथम इंटरप्रेटर तयार करण्यास सांगितले, जे त्यांनी 8 आठवड्यांत केले.

मायक्रोसॉफ्ट नावं कसं पडलं?

कंपनीला ॲलन आणि गेट्स काम आवडले. त्यानंतर दोघांनाही यंत्रणा विकसित करण्याचे आदेश मिळाले. येथूनच 'मायक्रोसॉफ्ट कंपनी' हे नाव मायक्रोप्रोसेसरच्या 'मायक्रो'वरून आणि सॉफ्टवेअरचे 'सॉफ्ट' असे. 3 वर्षांत कंपनीच्या विक्रीने 10 लाख डॉलर्सचा टप्पा पार केला.

यानंतर कंपनीने अनेक उत्पादने जारी केली, मायक्रोसॉफ्ट 1987 मध्ये सार्वजनिक झाली आणि गेट्स जगातील सर्वात तरुण अब्जाधीश बनले. संगणकाच्या वाढत्या वापरामुळे मायक्रोसॉफ्टचा विकास होत गेला.

इंटरप्रेटर म्हणजे काय?

इंटरप्रिटर हा एक सॉफ्टवेअर आणि संगणक प्रोग्राम आहे जो उच्च स्तरीय भाषेत लिहिलेल्या संगणक प्रोग्रामला मशीन कोडमध्ये रूपांतरित करतो. संगणकाला फक्त मशीन कोड समजतो, म्हणून संगणकाच्या मेमरीमध्ये फक्त मशीन कोडमध्ये लिहिलेले प्रोग्राम लोड केले जाणे महत्त्वाचे आहे. परंतु मशीन कोडमध्ये प्रोग्राम लिहिणे मानवांसाठी कठीण आहे कारण त्यात फक्त 0 आणि 1 बायनरी संख्या वापरली जातात.

याउलट इंग्रजी शब्द उच्च स्तरीय भाषेत जास्त वापरले जातात, त्यामुळे आपल्या माणसांना उच्च स्तरीय भाषेत प्रोग्राम लिहिणे सोपे जाते. उच्चस्तरीय भाषेत लिहिलेल्या प्रोग्राम्सचे मशीन कोडमध्ये रूपांतर करण्यासाठी इंटरप्रिटर वापरला जातो. उच्च स्तरीय भाषा मशीन भाषेत रूपांतरित करणारे सॉफ्टवेअर आणि प्रोग्राम यांना भाषांतरकार म्हणतात.

भाषांतरकारांचे प्रामुख्याने दोन प्रकार आहेत. संकलक आणि दुभाषी. जरी दोघे समान कार्य करतात, तरीही ते उच्च स्तरीय भाषा प्रोग्राम मशीन कोडमध्ये रूपांतरित करतात. पण दोघांमध्ये काही मूलभूत फरक आहे.