Robotic Fruit Picking: फळ प्रक्रिया उद्योगात खराब फळांमुळे इतर फळे खराब होऊन मोठे नुकसान होते. ते टाळण्यासठी कृत्रिम बुद्धिमत्ता अर्थात एआयचा वापर करून एक रोबोटिक यंत्रणा विकसित करण्यात श्रीयश कॉलेज ऑफ इंजिनिअरिंग ॲण्ड टेक्नॉलॉजीच्या सात प्राध्यापकांना यश आले असून, या रोबोटिक फ्रूट पिकिंग सिस्टिमसाठी त्यांना पेटंट मंजूर झाले आहे.

छत्रपती संभाजीनगरातील श्रीयश कॉलेज ऑफ इंजिनिअरिंग ॲण्ड टेक्नॉलॉजीच्या यांत्रिकी विभागाचे प्रमुख डॉ. हुलास तोंडे, प्रा. हर्षल चोथे, प्रा. गौरव देशपांडे, प्रा. दीपक देशमुख, प्रा. आकाश कोडारकर, प्रा. ब्रिजभूषण शुक्ला आणि प्रा. जुबेर शेख यांनी हे संशोधन केले आहे. यांत्रिकी प्रणाली, रोबोटिक्स आणि कृत्रिम बुद्धिमत्ता या तीन अत्याधुनिक तंत्रज्ञानाचा वापर करीत हे डिझाइन बनवले आहे. यासाठी त्यांना एका वर्षाचा कालावधी लागला.

या रोबोटिक सिस्टीमच्या डिझाइनबाबत या चमूला पेटंट मिळाल्याचे नुकतेच जाहीर करण्यात आले. याबद्दल श्रीयश प्रतिष्ठानचे अध्यक्ष बसवराज मंगरुळे, मुख्य कार्यकारी अधिकारी कर्नल जॉय डॅनियल, प्राचार्य डॉ. बी. एम. पाटील, अधिष्ठाता अकॅडमिक्स डॉ. पी. एम. अर्धापूरकर आणि ट्रैनिंग ॲण्ड प्लेसमेंट प्रमुख प्रा. अनिल पालवे यांनी प्राध्यापकांचे अभिनंदन केले आहे.

असे आहे रोबोटिक फ्रूट पिकिंग

फळ प्रक्रिया उद्योगात सडलेल्या फळांचा प्रश्न.

रोबोटिक यंत्रात कृत्रिम बुद्धिमत्तेचा केला वापर.

यंत्र एआयच्या मदतीने सडलेली फळे ओळखते.

त्यानंतर सडकी फळे प्रक्रियेत येण्याआधी काढते.