देशातील ९० टक्के मोटारींमध्ये आगीच्या प्रतिबंधासाठी ज्या रसायनांचा वापर केला जात आहे, त्यामुळे प्रवाशांना कर्करोग होण्याचा धोका संभवतो. राष्ट्रीय हरित लवादाने (एनजीटी) केंद्रीय रस्ते वाहतूक आणि महामार्ग मंत्रालयासह चार विभागांना नोटीस पाठवून उत्तर देण्याचे निर्देश दिले आहे.

केंद्रीय प्रदूषण नियंत्रण मंडळाने (सीपीसीबी) रसायनांच्या परिणामांची तपासणी करण्यास नकार दिला होता. तपासणीसाठी आवश्‍यक सुविधा नसल्याचे कारण यासाठी देण्यात आले होते. मात्र ही बाब लोकांच्या आरोग्याशी संबंधित असल्याने ‘एनजीटी’ने यासंदर्भातील वृत्ताची दखल घेतली असून यावर सुनावणी सुरू केली आहे. मोटारीतील आसनातील फोम आणि तापमान नियंत्रित करण्यासाठी करण्यात येणाऱ्या उपायांमध्ये या रसायनाचा वापर होतो. हे रसायन दीर्घकाळ मोटारीत राहिल्याने चालक आणि विशेषतः त्यातून प्रवास करणाऱ्या लहान मुलांना कर्करोग होण्याचा धोका उद्गभवू शकतो, अशी माहिती ‘एनजीटी’ला मिळाली आहे.

याप्रकरणी ‘सीपीसीबी’ने नुकताच एक अहवाल ‘एनजीटी’कडे दिला आहे. ‘टीसीआयपीपी’, ‘टीडीसीआयपीपी’ आणि ‘टीसीआयपी’ या रसायनांमुळे कर्करोग होतो किंवा नाही, याच्या तपासासाठी ‘भारतीय वैद्यकीय संशोधन परिषदे’कडे (आयसीएमआर) सर्व साधने आहेत,असे ‘सीपीसीबी’ने त्‍यात नमूद केले होते.

‘आठ आठवड्यांत उत्तर द्या’

या प्रकरणी आठ आठवड्यात उत्तर देण्याचे निर्देश ‘एनजीटी’ने सर्व विभागांना दिले आहेत. ‘सीपीसीबी’ व ‘आयसीएमआर’सह केंद्रीय रस्ते वाहतूक व महामार्ग मंत्रालयाचे सचिव, ‘ऑटोमोटिव्ह रिसर्च असोसिएशन ऑफ इंडिया’चे मुख्य प्रशासकीय अधिकारी, ‘नॅशनल ऑटोमोटिव्ह टेस्टिंग अँड आर अँड डी इंफ्रास्ट्रक्चर प्रोजेक्ट्स’चे मुख्य प्रशासकीय अधिकारी व भारतीय मानक संस्थेचे महासंचालक या सर्वांना पुढील सुनावणीआधी उत्तर देण्यास सांगितले आहे.