Smartphone Launch : भारताच्या स्मार्टफोन जगतात आज मोठा धमाका होणार आहे. स्वदेशी कंपनी CMF भारतात आपला पहिला स्मार्टफोन CMF Phone 1 लाँच करणार आहे. या फोनमध्ये हाय-एन्ड स्पेसिफिकेशन्स आणि बदलता येणारे अॅक्सेसरीज असतील अशी अपेक्षा आहे. फोन कधी लाँच होणार आणि त्याची वैशिष्ट्ये काय असतील याची सविस्तर माहिती आम्ही तुम्हाला देणार आहोत.

कंपनीने काही दिवसांपूर्वीच फोनच्या डिझाईनची झलक दाखवली होती. त्यानुसार, फोनमध्ये बदलता येणारी अॅक्सेसरीज आणि कव्हर्स असतील असे दिसून येते. याची Brand Ambassador दाक्षिणात्य अभिनेत्री रश्मिका मंदना ही आहे. भारतातील टेक्नो प्रेमींच्या प्रतीक्षेचा क्षण अखेर येऊन ठेपला आहे. आज दुपारी 2:30 वाजता CMF Phone 1 ची लाईव्हस्ट्रीम कंपनीच्या युट्यूब चॅनलवर पाहायला मिळेल. सोबतच कंपनी सोशल मीडियावरही अपडेट्स देत राहील.

फोनच्या किमतीबद्दल अद्याप अधिकृत घोषणा झालेली नाही. परंतु, टिप्सटर योगेश ब्रार यांनी केलेल्या लीकनुसार, 6GB रॅम आणि 128GB स्टोरेज असलेल्या बेस व्हेरिएंटची किंमत 15,999 रुपये (बँक ऑफर्ससह) असण्याची शक्यता आहे. तसेच 8GB रॅम आणि 128GB स्टोरेज असलेल्या व्हेरिएंटची किंमत 17,999 रुपये (बँक ऑफर्ससह) असण्याची शक्यता आहे.

CMF Phone 1 मध्ये 6.7-इंच FHD+ AMOLED डिस्प्ले आणि 120Hz रिफ्रेश रेट असण्याची शक्यता आहे. प्रोसेसर म्हणून MediaTek Dimensity 7300 चिपसेट असू शकते. 50 मेगापिक्सल मुख्य सेन्सर आणि डेप्थ सेन्सर अशा ड्यूल रियर कॅमेरा सेटअपची अपेक्षा आहे. सेल्फीसाठी 16 मेगापिक्सल फ्रंट कॅमेरा असू शकतो. बॅटरी 5,000mAh असून 33W फास्ट चार्जिंग सपोर्ट देण्याची शक्यता आहे. ऑपरेटिंग सिस्टीम म्हणून Android 14 असू शकते.