आजकाल सर्वच गोष्टी महाग होत आहेत. सिलेंडरपासून ते वीजेच्या दरापर्यंत सर्वच गोष्टी आवाक्याबाहेर चालल्या आहेत. मात्र, तुम्हाला जर असं वाटत असेल, की थोड्याशा वापरासाठी तुम्ही जरा जास्तच लाईट बिल भरत आहात; तर याला कदाचित तुमचा घरमालकही कारणीभूत असू शकतो.

अशा बऱ्याच घटना समोर आल्या आहेत, ज्यामध्ये घरमालक सब-मीटरमध्ये छेडछाड करून भाडेकरूंना भरमसाठ बिल भरायला लावतो आहे. सब-मीटर हे मुख्य मीटरला जोडलेले असल्यामुळे मालकाला कमी आणि भाडेकरूला जास्त बिल येतं. तुमचा घरमालक देखील असं करत असल्याचा संशय तुम्हाला असेल, तर ही बातमी तुमच्यासाठी महत्त्वाची आहे.

असा तपासा झोल

तुमच्या घरमालकाने सब-मीटरमध्ये काही गडबड केली आहे का हे तपासणं अगदी सोपं आहे. यासाठी तुम्हाला गेल्या काही महिन्यांचं बिल पहावं लागेल. एखाद्या महिन्यात तुमचा वापर सारखाच आहे, आणि बिल अचानक वाढलेलं दिसलं, तर तिथे शंकेला वाव निर्माण होतो.

उन्हाळ्यात बिल येतं जास्त

हे लक्षात घ्या की उन्हाळ्यात आपल्याकडे फॅन, एसी अशा गोष्टी भरपूर प्रमाणात वापरल्या जातात. त्यामुळे उन्हाळ्यात स्वाभाविकपणे लाईट बिल जास्तच येतं. त्यामुळे आधीच्या लाईट बिलसोबत तुलना करताना तुम्ही या उन्हाळ्यातील बिल मागच्या उन्हाळ्यातील बिलाशीच कम्पेअर करताय, याची खात्री करा.

दुसरं मीटर लाऊन पाहा

जर तुम्हाला वीज बिलामध्ये काही गफलत असल्याचं दिसून आलं, तर तुमच्या सब-मीटरजवळ तुम्ही दुसरं मीटर लावून पाहू शकता. या दोन्ही मीटरवर जर वेगवेगळं रीडिंग आलं, तर जुन्या मीटरमध्ये काहीतरी घोटाळा असल्याचं स्पष्ट होईल. मात्र जर हे दोन्ही रीडिंग समान आले, तर तुम्हालाच वीजेचा वापर प्रमाणात करण्याची गरज आहे हे लक्षात घ्या.