इलॉन मस्कने काही दिवसांपूर्वी 'एक्स' (ट्विटर) प्लॅटफॉर्मच्या अ‍ॅड्स रेव्हेन्यू प्रोग्रामची घोषणा केली होती. या माध्यमातून यूजर्सना ट्विटरवरुन पैसे कमावण्याची संधी उपलब्ध करण्यात आली होती. आता याबाबतचे नियम आणखी शिथील करण्यात आले आहेत. त्यामुळे अधिकाधिक यूजर्स सोप्या पद्धतीने पैसे कमावू शकणार आहेत.

५० लाख इम्प्रेशन्स

यापूर्वीच्या नियमांनुसार, पैसे कमावण्यासाठी यापूर्वी यूजर्सना अकाउंटवर कमीत कमी ५०० फॉलोवर्स, ब्लू टिक आणि तीन महिन्यांच्या कालावधीत १५ मिलियन ट्विट इम्प्रेशन गरजेचे होते. मात्र, आता ट्विट इम्प्रेशनची मर्यादा तीन महिन्यांत केवळ ५ मिलियन (५० लाख) इम्प्रेशन्स गरजेचे आहेत.

मिनिमल विड्रॉवल लिमिट

यापूर्वी यूजर्सना कमावलेले पैसे काढून घेण्यासाठी विड्रॉवल लिमिट ही ५० डॉलर्स होती. ती आता बदलून १० डॉलर्स करण्यात आली आहे. त्यामुळे यूजर्स आणखी लवकर आपले पैसे मिळवू शकतील. (Twitter News)

ठेवली मोठी अट

नियमांमध्ये बदल करण्यात आले असले, तरी मस्कने यात एक मोठी अटही ठेवली आहे. तीन महिन्यांमध्ये मिळालेले ५ मिलियन इम्प्रेशन्स हे केवळ व्हेरिफाईड अकाउंट्सने असायला हवेत. फ्री अकाउंट्सने मिळालेल्या इम्प्रेशन्सना यात मोजलं जाणार नाही. बॉट्स किंवा स्पॅमच्या मदतीने कोणी चीटिंग करू नये यासाठी हा नियम लागू करण्यात आला आहे.

अ‍ॅड रेव्हेन्यू प्रोग्राम हा केवळ ब्लू टिक असणाऱ्या यूजर्ससाठी असणार आहे. सोबतच, कमीत कमी ५०० फॉलोवर्स असण्याच्या नियमात कोणताही बदल करण्यात आलेला नाही. त्यामुळे ट्विटरवरुन (एक्स) पैसे कमावण्यासाठी तुम्हाला या अटींची पूर्तता करणं गरजेचं आहे.