नवी दिल्ली- जगात पहिल्यांदाच एक व्यक्तीच्या मेंदुमध्ये चीप बसवण्यात आली आहे, न्यूरोलिंक कंपनीचे संस्थापक आणि अब्जाधीश इलॉन मस्क यांनी यासंदर्भातील माहिती दिली आहे. त्यांनी सोशल मीडिया प्लॅटफॉर्म एक्सवर यासंदर्भातील माहिती दिली आहे. एका मानवी रुग्ण्याच्या मेंदूमध्ये पहिल्यांदाच चीप बसवण्यात आली असून चांगला प्रतिसाद मिळत असल्याचं ते म्हणाले आहेत.( first human patient received an implant from brain chip startup Neuralink company billionaire founder Elon Musk said)

न्यूरॉन्स हे असे सेल्स असतात जे इलेक्ट्रिकल आणि केमिकल सिग्नलचा वापर करुन मेंदू आणि शरीरात माहिती पोहोचवत असतात. अमेरिकेच्या अन्न आणि औषध प्रशासनाने मागील वर्षी न्यूरालिंक कंपनीला चिप मेंदूमध्ये बसवण्याचा प्रयोग करण्याची परवानगी दिली होती.त्यानंतर सप्टेंबरमध्ये न्यूरालिंकने सांगितलं होतं की, एका पॅरालिसिस झालेल्या रग्णावर चाचणी घेण्याची त्यांना परवानगी मिळाली आहे.

ब्रेन कॉम्प्युटर इंटरफेस brain-computer interface (BCI) मेंदूच्या एका विशिष्ठ भागात बसवण्यात येते. हालचाल करण्यासाठी सिग्नल देणाऱ्या सेल्सवर नियंत्रण मिळवण्याचा प्रयत्न या माध्यमातून केला जातो. न्यूरालिंकने दिलेल्या माहितीनुसार, त्यांचा प्राथमिक उद्देश हा आपल्या विचारांचा वापर करुन कॉम्युटर कर्सर किंवा किबोर्डचा वापर फक्त करता यावा हा आहे.

मस्क यांनी यासंदर्भातील एका दुसऱ्या पोस्टमध्ये म्हटलंय की, न्यूरालिंकच्या पहिल्या उत्पादनाला टेलीपाथी म्हटलं जाईल. यासंदर्भातील अधिक माहिती देण्यास न्यूरालिंकने तुर्तास नकार दिला आहे. मात्र, न्यूरालिंकच्या या प्रयोगामुळे नव्या क्रांतीची मुहूर्तवेढ रोवली गेल्याची चर्चा आहे. खासकरुन शरीर निकामी झालेल्या किंवा पॅरोलेसिस झालेल्या रुग्णांसाठी हे एक वरदान ठरणार आहे. (Latest Marathi News)