COD Modern Warfare 3 : कॉल ऑफ ड्यूटी गेम खेळणाऱ्यांसाठी एक मोठी बातमी आहे. या गेममधील मॉडर्न वॉरफेअर 3 कॅम्पेन नुकतंच लाँच करण्यात आलं आहे. मात्र, हे व्हर्जन लाँच करण्यासाठी आधी गेमर्सना मॉडर्न वॉरफेअर 2 लाँच करणं अनिवार्य असल्याचं स्पष्ट झालं आहे. याशिवाय ही गेम सुरूच होत नसल्याचं पाहून जगभरातील गेमर्स संतापले आहेत.

पीसीगेमर वेबसाईटने याबाबतचं वृत्त प्रसिद्ध केलं आहे. ही गोष्ट तेवढी मोठी वाटत नाही. मात्र, ही एकूण प्रक्रियाच अगदी किचकट आणि वेळखाऊ असल्याचं गेमर्सचं म्हणणं आहे. COD हेडक्वार्टर्सवरुन गेम लाँच करताना ही समस्या येत असल्याचं गेमर्सचं म्हणणं आहे.

नक्की काय आहे समस्या?

जेव्हा गेमर्स Call of Duty HQ वर जातात, तेव्हा तिथून वॉरझोन किंवा मॉडर्न वॉरफेअर 2 याठिकाणी जाणं सोपं आहे. मात्र, मेन मेन्यूमधून जेव्हा गेमर्स मॉडर्न वॉरफेअर 3 या पर्यायावर क्लिक करतात, तेव्हा पूर्ण HQ अ‍ॅपच बंद होतं, आणि एक पूर्णपणे वेगळी विंडो लाँच होते, ज्यामध्ये मॉडर्न वॉरफेअर 3 लोड होऊ लागते.

MW3 थेट लाँच करण्यासाठी स्वतंत्र प्रक्रिया नाही. MW2 लाँच करुन त्यानंतर मॉडर्न वॉरफेअर 3 सुरू करण्याच्या प्रक्रियेत सुमारे दीड मिनिटे वेळ लागत आहे. बॅटल डॉट नेट या ब्लिझार्ड लाँचरवर मात्र ही समस्या येत नसल्याचंही सांगण्यात येत आहे. त्यामुळेच COD HQ लाँचरवर गेमर्स वैतागले आहेत.