Download Voter ID Card : सध्या लोकसभा आणि विधानसभा निवडणुकांचं वारं वाहू लागलं आहे. देशातील कित्येक तरुण यंदा पहिल्यांदा मतदान करणार आहेत. तुम्हीदेखील यांपैकीच एक असाल, आणि अजून आपलं मतदान कार्ड तुम्ही डाऊनलोड केलं नसेल; तर ही बातमी तुमच्यासाठी आहे.

कित्येक वेळा साध्या-सोप्या ऑनलाईन कामांसाठी आपण सायबर कॅफेमध्ये जातो, आणि तिथे पाच-पन्नास रुपये द्यावे लागतात. मात्र, आता तुम्ही स्वतःच आपलं मतदान ओळखपत्र कार्ड (डिजिटल e-EPIC कॉपी) डाऊनलोड करू शकणार आहात. यासाठी अगदी सोपी पद्धत आम्ही तुम्हाला सांगणार आहोत.

असं करा डाऊनलोड

Voter ID Card डाऊनलोड करण्यासाठी तुम्हाला सर्वात आधी भारतीय निवडणूक आयोगाच्या मुख्य वेबसाईटला भेट द्यावी लागेल. https://voterportal.eci.gov.in/ किंवा https://old.eci.gov.in/e-epic/ या दोन्हींपैकी एका वेबसाईटवर तुम्ही जाऊ शकता. तसंच तुम्हाला NVPS पोर्टलवर आपलं अकाउंट तयार करावं लागेल. (How to download Voter ID)

• आपल्या अकाउंटला लॉगइन केल्यानंतर तुम्हाला आपला इलेक्शन फोटो आयडेंटिटी कार्ड (EPIC) नंबर एंटर करायचा आहे. सोबतच फॉर्म रेफ्रन्स नंबर एंटर करून आपलं राज्य निवडायचं आहे.

• यानंतर तुमच्या रजिस्टर्ड मोबाईल नंबरवर एक ओटीपी येईल. हा ओटीपी एंटर केल्यानंतर तुमचं व्होटर आयडी कार्ड डाऊनलोड करण्यासाठी स्क्रीनवर पर्याय दिसेल.

• Download e-EPIC या पर्यायावर क्लिक केल्यानंतर तुमच्या व्होटर कार्डची PDF फाईल डाऊनलोड होईल.

• हे व्होटर आयडी तुम्ही PDF फॉरमॅटमध्ये सेव्ह करुन ठेऊ शकता, किंवा डिजिलॉकरला देखील अपलोड करून ठेऊ शकता.

असं करा अप्लाय

तुमचं वय जर 18 वर्षे पूर्ण असेल, किंवा तुम्ही पुढील काही दिवसांमध्ये 18 वर्षांचे होणार असाल; तर तुम्ही फॉर्म 6 भरुन मतदान कार्ड मिळवण्यासाठी आपलं नाव नोंदवू शकता. यासाठी देखील व्होटर पोर्टलवर जावं लागेल. याठिकाणी पहिलाच पर्याय तुम्हाला 'Fill Form 6' असा दिसेल. यावर क्लिक करून, आवश्यक ती माहिती भरून तुम्ही आपलं व्होटर आयडी तयार करून घेऊ शकता.