मेटा कंपनीचे सीईओ मार्क झुकेरबर्ग यांनी केलेलं एक ट्विट सध्या मोठ्या प्रमाणात व्हायरल होत आहे. याचं कारण म्हणजे, तब्बल ११ वर्षांनंतर मार्कने ट्विटरवर पुनरागमन केलं आहे. झुकरबर्गने एक मीम टेम्प्लेट पोस्ट करुन थेट ट्विटरचे मालक इलॉन मस्कला डिवचलं आहे.

बुधवारी इन्स्टाग्रामने आपलं थ्रेड्स नावाचं नवीन अ‍ॅप लाँच केलं. या अ‍ॅपवर यूजर्स अगदी ट्विटरप्रमाणेच कमी शब्दांमध्ये पोस्ट करू शकणार आहेत. त्यामुळे थ्रेड्स हे अ‍ॅप ट्विटरला टक्कर देणार आहे. हे अ‍ॅप लाँच झाल्यानंतर काही वेळातच मार्क यांनी एक मीम ट्विट केला.

मार्कचं ट्विट

२०१२ नंतर मार्क यांचं हे पहिलंच ट्विट आहे. यामध्ये त्यांनी दोन स्पायडरमॅन एकमेकांकडे पाहत असल्याचा मीम पोस्ट केला आहे. दोन गोष्टींमधील एकसारखेपणा दाखवण्यासाठी या मीम टेम्प्लेटचा वापर होतो. मस्क यांनी या मीमवर काहीही कॅप्शन दिलं नाहीये. तरीही, यातून ट्विटर आणि थ्रेड्स अशा दोन अ‍ॅप्सबद्दल इशारा देण्यात आल्याचं कळत आहे.

थ्रेड्समुळे ट्विटरला फटका

इलॉन मस्क यांनी विकत घेतल्यापासून ट्विटरच्या अडचणींमध्ये सातत्याने वाढ होत आहे. कामगारांचे लेऑफ, जाहिरातदारांची पीछेहाट आणि यूजर्सवर लागू होणारे निर्बंध यामुळे कित्येक लोक ट्विटरला चांगला पर्याय शोधत आहेत.

अशातच मार्क झुकेरबर्गच्या इन्स्टाग्रामने थ्रेड्स हे अ‍ॅप लाँच करून लोकांना एक वेगळा पर्याय दिला आहे. त्यामुळे ट्विटरच्या अडचणीत आणखी वाढ होण्याची शक्यता आहे.

थ्रेड्स हे अ‍ॅप १००हून अधिक देशांमध्ये लाँच झालं आहे. यामध्ये भारताचा देखील समावेश आहे. इन्स्टाग्राम यूजर्स आपल्या सेम लॉग-इन क्रेडेंशिअल्सच्या मदतीने थ्रेड्स अ‍ॅप वापरू शकणार आहेत.