रक्षाबंधन हा सण बहिण-भावाच्या गोड नात्याचा. बहीण भावाला ओवाळून राखी बांधते, आणि भावाच्या भरभराटीची प्रार्थना करते. तर, भाऊ बहिणीची रक्षा करण्याचं वचन देतो, आणि सोबतच बहिणीला ओवाळणी म्हणून भेटही देतो.

सध्याचं जग हे डिजिटल आहे. यामुळेच ओवाळणी म्हणून देणारी भेटवस्तू किंवा पैसे देखील डिजिटल पद्धतीने देण्यात येत आहे. काही भाऊ आपल्या बहिणीला ऑनलाईन गिफ्ट मागवतात, किंवा मग मोबाईल स्कॅनरच्या मदतीने तिला पैसे देतात. मात्र, एका बहिणीने गिफ्ट घेण्यासाठी वेगळीच शक्कल लढवली आहे.

क्यूआर कोड

आपल्याला माहिती आहे, की यूपीआय पेमेंट करण्यासाठी आपल्याला एक QR कोड स्कॅन करावा लागतो. एका मुलीने हेच लक्षात घेऊन, चक्क आपल्या मेहंदीमध्येच क्यूआर कोडचं डिझाईन करून घेतलं आहे. त्यामुळेच, यूपीआय अ‍ॅपमधून ही मेहंदी स्कॅन केल्यास, थेट तिच्या अकाउंटमध्ये पैसे पाठवण्याची सोय झाली आहे.

सोशल मीडियावर ही ट्रिक मोठ्या प्रमाणात व्हायरल होते आहे. या व्हिडिओला 2.3 मिलिनयहून अधिक व्ह्यूज मिळाले आहेत. तर सुमारे 21 हजार एक्स (ट्विटर) यूजर्सनी याला लाईक केलं आहे. यावर लोक विविध प्रकारच्या प्रतिक्रिया देत आहेत.

लोकांच्या प्रतिक्रिया

काही यूजर्सनी या व्हिडिओच्या सत्यतेवर शंका व्यक्त केली आहे. हा व्हिडिओ फेक असल्याचं काहींचं म्हणणं आहे. मात्र बाकी यूजर्स या व्हिडिओचं कौतुक करताना दिसत आहेत. फेक असो वा खरं, ही आयडिया खरंच भारी आहे, असं एका यूजरने म्हटलं आहे. तर, 'डिजिटल इंडिया' मोहिमेमुळे काय काय पहावं लागणार आहे, असंही दुसऱ्या एका यूजरने म्हटलं आहे.