इलॉन मस्कने विकत घेतल्यापासून एक्स (आधीचे ट्विटर) या अ‍ॅपमध्ये कित्येक बदल करण्यात आले आहेत. आता मस्कने यात आणखी एका नवीन फीचरची घोषणा केली आहे. 'See Similar Post' असं हे नवीन फीचर असणार आहे. हे फीचर एआयवर आधारित आहे.

एक्सला 'एव्हरिथिंग अ‍ॅप' बनवण्याचा इलॉन यांचा प्रयत्न आहे. यासोबतच एक्स वापरण्याचा यूजर्सचा अनुभव आणखी चांगला व्हावा यासाठी देखील मस्क कित्येक नवीन फीचर्स लाँच करत असतात. यासाठीच हे नवीन फीचर आणलं आहे.

काय आहे फीचर?

'सी सिमिलर' या फीचरमुळे आता यूजर्सना एकाच विषयाच्या पोस्ट एक्सवर पाहता येणार आहेत. म्हणजे तुम्ही एखाद्या विषयावरील पोस्ट पाहत असाल, आणि तुम्हाला त्यासंबंधी इतर पोस्ट पहायच्या असतील; तर हा पर्याय तुमची मदत करेल.

एकाच प्रकारच्या पोस्ट दाखवण्यासाठी एआयची मदत घेण्यात येणार आहे. यामुळे यूजर्सना केवळ आपल्याला हव्या असणाऱ्या विषयावरील पोस्ट पाहणं शक्य होणार आहे. त्यामुळे यूजर्सचा एक्स वापरण्याचा अनुभव आणखी पर्सनलाईज्ड होणार आहे.