आपल्या देशात लोकांच्या श्रद्धेशी संबंधित अनेक गोष्टी अचंबित करतात. श्रद्धा असेल की देव सारे काही देतात हे माहिती असूनही लोक देवाला महागड्या वस्तू, उंची वस्त्र देतात. तर, काही मंदिरांमध्ये बुचकळ्यात टाकणारे पदार्थ प्रसाद म्हणून दिला जातो.

प्रसादाची गोष्ट येते तेव्हा दक्षिण भारतातील तिरूपती बालाजीचा प्रसादाचा लाडू जगात फेमस आहे. तर, काही मंदिरात खिचडी, गुरूद्वाऱ्यातील मोठ्या लंगरमध्ये भात, आमटी दिली जाते. पण, भारतातील काही मंदिरांमध्ये भाविकांना प्रसाद म्हणून मटण, चिकन बिर्याणी दिली जाते.(Devotional India : Indian Temples Where They Serve Non-Veg Prasad)

महाराष्ट्राचा विचार केला तर हि गोष्ट फार काही विशेष वाटणार नाही. कारण, आपल्या ग्रामदैवताच्या म्हाईला, जत्रेला बोकड कापणं, जत्रेच्या पंगती उठणं सामान्य बाब आहे. पण, देशातील इतर राज्यात अशा गोष्टी क्वचित एखाद्या मंदिरात होत असतात.  त्यापैकीच काही मंदिरांची माहिती आज जाणून घेऊयात.

विमला मंदिर, ओडिसा

ओडिसात असलेले हे देवीचे मंदिर असून त्यात विमला देवी विराजमान आहेत. नवरात्रीच्या काळात या देवीला ताजे मासे आणि मटणाचा नैवेद्य असतो.  तसेच, देवीसमोर बळी दिलेले बोकडच देवीला नैवेद्य म्हणून दाखवले जाते.

मुथप्पन मंदिर, केरळ

मुथप्पन मंदिर केरळच्या कन्नूर जिल्ह्यातील तालिपरंबापासून १० किमी अंतरावर वालापट्टनम नदीच्या काठावर आहे.

या मंदिराचे दैवत श्री मुथप्पन आहे. या मंदिरात आरतीनंतर फणस आणि चहा लोकांना दिला जातो. या प्रसादाव्यतिरिक्त देवाला मासे आणि ताडी अर्पन केले जाते.पुढे त्याच गोष्टी प्रसाद म्हणून दिल्या जातात.

मुनियादी स्वामी मंदिर, तामिळनाडू

तामिळनाडूतील वडाक्कमपट्टी येथील मुनियादी स्वामी मंदिरात प्रसाद म्हणून बिर्याणीचे वाटप केले जाते. मुनीश्वर हे खरे तर शिवाचा आणखी एक अवतार म्हणून ओळखले जातात. या मंदिरात प्रसाद म्हणून चिकन आणि मटण बिर्याणी दिली जाते.

ही बिर्याणी गरजू लोकांना वाटण्यासाठी बनवली जाते आणि ती दरवर्षी बनवली जाते. थिरुमंगलम तालुक्यातील वदक्कमपट्टी या छोट्याशा गावात वसलेल्या या मंदिराची ही परंपरा नवीन नाही, परंतु १०० वर्षांहून अधिक काळापासून येथील लोक या परंपरेचे पालन करीत आहेत.

कालीघाट, कोलकाता

कालीघाट हे कोलकाता, पश्चिम बंगालमधील एक शक्तीपीठ आहे. मान्यतेनुसार या ठिकाणी आई सतीच्या उजव्या पायाची काही बोटे पडली होती.

आज हे ठिकाण काली भक्तांचे सर्वात मोठे मंदिर आहे. केवळ बंगालच नाही तर देशभरातून आणि जगभरातून लोक आईच्या दर्शनासाठी येतात.