हर्णै : अरबी समुद्रात कमी दाबाचा पट्टा निर्माण झाल्याने वादळसदृश परिस्थिती निर्माण झाली. यामुळे मासळीही नाही आणि अतिवृष्टीमुळे पर्यटकांच्या (Tourists) आनंदाचा बेतही फसला. बहुतांशी पर्यटक न थांबता दुसऱ्या दिवशी परत माघारी फिरले.

त्यामुळे वादळी परिस्थितीमुळे पर्यटक हिरमुसले होऊन परतल्याने त्याचा मोठा फटका पर्यटन व्यवसायालाही बसला. सलग सुटी असली की दापोली तालुक्यात पर्यटकांची गर्दी होते. अनंत चतुर्दशीला जोडून पुढे रविवार, सोमवारही सुटी आल्याने हजारो पर्यटकांनी दापोलीत हजेरी लावली.

दापोली तालुक्याची किनारपट्टीला व किनाऱ्यावर असलेली रिसॉर्ट पर्यटकांनी फुल्ल होती. किनाऱ्यावर मज्जा करणे, समुद्रात पोहण्याचा आनंद लुटणे, वॉटरस्पोर्टस्‌वर मज्जा करणे आदी गोष्टींचा आनंद घेण्यासाठी पर्यटक बहुसंख्येने येतात. दापोली तालुक्यात आलेला पर्यटक हर्णै बंदरातील ताजी मासळी खायला कधीच चुकत नाही. गेले दोन-तीन दिवस बंदरात मासळी खरेदीसाठी (Fish Market) गर्दी होती.

पर्यटकांच्या आगमनामुळे व्यावसायिक आनंदित असतानाच गेले दोन दिवस पडणाऱ्या पावसाने पर्यटकांसह व्यावसायिकांच्या आनंदावर विरजण पडले. तीन दिवस पडलेल्या पावसाने पर्यटकांना मज्जाच करता आली नाही. काही ठिकाणी ढगफुटीसारखा पाऊस पडत होता. केळशी, मुरूड गावांतील अंतर्गत रस्त्यांवर पाणीच पाणी झाले होते. समुद्राला आलेल्या प्रचंड उधाणामुळे पाणी वाढले होते.

समुद्रही खवळला होता. भरतीच्या पाण्याने संपूर्ण किनारपट्टी वेढली गेली होती. त्यामुळे किनारपट्टीवरील सर्व उद्योग, वॉटरस्पोर्टस्‌ बंदच होते. त्यामुळे पर्यटकांना समुद्रस्नानाचादेखील आनंद घेता आला नाही. त्यामुळे जे पर्यटक रिसॉर्टला उतरले होते ते तेथून बाहेरच पडले नाहीत. दोन दिवसांचा पावसाचा इशारा समजल्यानंतर पर्यटकांनी दुसऱ्या दिवशीच चेकआऊट केले आणि परतीचा प्रवास करणे पसंत केले.

गणेशोत्सवाआधी दोन दिवस हर्णै बंदरातील मासेमारीला ब्रेक लागला होता. त्यामुळे मासेमारी सुरू झाली नव्हती. त्यात गेले तीन दिवस अतिवृष्टी आणि वादळामुळे मच्छीमारांना घरीच बसावे लागले. त्यामुळे पर्यटकांना ताजी मासळीही मिळाली नाही. पावसामुळे आधीच निराश झालेले पर्यटक मासळी नसल्याने आणखीनच नाराज झाले.

चिमणी बाजारातील काही विक्रेत्या महिलांनी साठवून ठेवलेली मासळी पर्यटकांना मिळाली. या सुट्या पर्यटकांच्यादृष्टीने फुकट गेल्याच तसेच मासळी उद्योग आणि पर्यटन उद्योगाचेही प्रचंड नुकसान झाले. आज सकाळी पागवून मिळालेली थोडीफार मासळी बंदरात विकण्यासाठी चिमणी बाजारात आली होती; परंतु ही मासळी खूपच महाग असल्याने पर्यटकांची निराशा झाली.

गेल्या पाच दिवसांच्या सुटीमध्ये अतिवृष्टीमुळे पर्यटकांना मज्जा करता आली नाही. बोटिंग, वॉटरस्पोर्टस्‌चा आनंद घेता आला नाही. किनाऱ्यावरही पर्यटकांना फिरता आले नाही. तसेच मासेमारी बंद असल्याने ताजी मासळी मिळाली नाही. त्यामुळे पर्यटक पाच दिवसांची सुटी असूनही दोन दिवसांत परत गेले. यामुळे पर्यटन व्यवसायाचे मोठे नुकसान झाले.

-धीरज बागकर, पर्यटन व्यावसायिक, सालदुरे