सोशल मीडियासाठी रील बनवणे आता नवे राहिले नाही. रील बनवण्यासाठी आणि सोशल मीडियावर फेमस होण्यासाठी कोण काय करेल याचा नेम नाही. स्टंट करणे, डान्स करणे, नियम मोडणे असे वेगवेगळे प्रयोग रीलसाठी केले जातात. तर सध्या असाच एक व्हिडिओ व्हायरल झाला असून त्यामध्ये एक नवरी गाडीवर बसून रील बनवताना दिसत आहे.

सदर व्हिडिओ दिल्ली येथील असून एक नवरी नवरीच्या वेशामध्ये दुचाकीवर बसून रील बनवत आहे. 'सजनजी वारी वारी' हे गाणं या रीलच्या पाठीमागे लावलं असून हा व्हिडिओ सोशल मीडियावर व्हायरल झाल्यानंतर पोलिसांनी या तरूणीवर कारवाई केली आहे. दिल्ली पोलिसांनी 10 जून 2023 राजी या तरूणीवर कारवाई करत स्लिपचा तपशील अधिकृत ट्वीटरवरून शेअर केला आहे.

दरम्यान, दिल्ली पोलिसांनी स्कूटर चालवणाऱ्या महिलेवर हेल्मेटशिवाय गाडी चालवल्याबद्दल 1,000 रुपये दंड ठोठावण्यात आला. त्याचबरोबर विना परवाना वाहन चालवल्यास 6,000 रुपये दंड ठोठावण्यात आला आहे. तिला नवरीच्या वेषात गाडी चालवून रील बनवणे चांगलेच महागात पडले असून लगेच तिला तिच्या रीलचे फळ मिळाले आहे.

दिल्ली पोलिसांनी व्हायरल केलेला हा व्हिडिओ सोशल मीडियावर चांगलाच व्हायरल झाला असून, "रस्त्यावर रील बनवणे चुकीचे असून एका रील साठी आयुष्य धोक्यात घालू नये, रस्त्यावर असे स्टंट करू नयेत" असा संदेश दिला आहे.